2025–2026 jylǵy jylytu mausymy Almatyda qalypty rejımde ótíp jatyr, qazandyqtarda tehnologıyalyq aqau men apat tírkelgen joq, – dep habarlaıdy aqshamnews.kz tílshísí.
Óńírlík kommunıkatsıyalar qyzmetínde ótken baspasóz konferentsıyasynda «Almatyteplokommunenergo» JShS bas ınjenerí Pavel Ledentsov osylaı dep málímdedí. Ol jylu kózderíníń jūmysy, jabdyqtardy jańǵyrtu men kelesí jylytu mausymyna daıyndyq turaly aıtyp berdí.
«Almatyteplokommunenergo» JShS qaladaǵy jylu óndíretín kásíporyn. Jylu kózínde 86 qazandyq bar. Onyń íshínde toǵyzy írí qazandyqtyń sanatyna jatady, olardyń quaty saǵatyna 35-ten 502 Gkal-ǵa deıín. Qalǵan 77-sí shaǵyn qazandyq, olardyń quaty 0,1-den 30 Gkal/saǵ aralyǵynda. Qazandyqtar Almatynyń jetí audanynda ornalasqan, olar tūrǵyn úılerdí, áleumettík nysandardy, kásíporyndar men ūıymdardy jylumen qamtamasyz etedí. Jalpy alǵanda, kásíporyn qaladaǵy jylu energıyasy men ystyq suǵa degen qajettílíktíń shamamen 35 paıyzyn qamtamasyz etedí. Qazandyqtardyń jalpy ornatylǵan quaty 1877,23 Gkal/saǵ, negízgí otyny– tabıǵı gaz.
Kásíporyn qazandyqtarynan 8 560 abonent jylu alady. Olardyń qatarynda 3 393 kópqabatty tūrǵyn úı, 346 jeke úı, 81 mektep, 63 balabaqsha, 37 auruhana men 4 640 ózge tūtynushy bar.
«Qala tūrǵyndaryna jylu bergende kídírís bolmauy kerek. Júıedegí negízgí parametrler – qysym men jylutasyǵyshtyń temperaturasy – jylu jelíleríníń kestelerí men ótínímderíne sáıkes qatań saqtalady. Búkíl mausym boıy bíz jabdyqtardyń jaı-kúıín úzbeı baqylaımyz. Būl kez kelgen ózgeríske jedel áreket etíp, yqtımal aqaudyń aldyn aluǵa múmkíndík beredí», – dedí Pavel Ledentsov.
Onyń aıtuynsha, qazandyqtardaǵy jabdyqtardyń jūmysy táulík boıy baqylauda bolady. Jedel qyzmetkerler tórt auysymmen jūmys ístep, tehnıkanyń jaǵdaıyn qadaǵalaıdy. Eger bógde shu, díríl paıda bolyp, temperatura kóterílíp, aǵyp ketíp jatsa, jabdyq toqtatylyp, júıe rezervtík quatqa auystyrylady. Osydan keıín mamandar tekserís júrgízíp, qajettí jóndeu jūmysyn jasaıdy.
«Ár nysanda rezervtík quat kózderí qarastyrylǵan, sondyqtan qajet bolǵan jaǵdaıda júıení tez auystyra alamyz. Jabdyq toqtatylǵannan keıín mamandar mūqıyat qarap, aqaudyń sebebín joyady. Mūndaı tásíl tehnologıyalyq aqaudyń qaupín barynsha azaıtady. Sonyń nátıjesínde bıylǵy mausymda qazandyqtarda apat bolǵan joq», – dep túsíndírdí ol.
Sonymen qatar kásíporyn 2026 jyldyń jazyndaǵy jóndeu nauqanyna jáne 2026–2027 jyldarǵy keler mausymǵa daıyndyq jūmystaryn bastap kettí. Qazír aǵymdaǵy jáne kúrdelí jóndeu úshín qosalqy bólshekter, jabdyqtar, qūbyrlar men ysyrma armaturalary satyp alyna bastady. Sondaı-aq qazandyqtardy uaqytsha toqtatu kestesí ázírleníp, sol kezeńde qajettí jūmystar júrgízíledí.
Būdan bólek, «Ormanova» qazandyǵyn qaıta jańartu jūmystaryna daıyndyq bastaldy. Merdíger ūıymmen qūrylys-montaj jūmysyn júrgízu turaly kelísímshart jasalyp, qajettí jabdyq satyp alyndy. Qūrylys jūmysy jylytu mausymy ayaqtalǵannan keıín bírden bastalady. Sonymen qatar «Staroelevatorskaya» qazandyǵyn qaıta jańǵyrtu boıynsha qūrylys-montaj jūmysyna baıqau jarıyalandy. Merdíger anyqtalǵannan keıín jobany íske asyrady.
«Jylumen jabdyqtau júıesíníń senímdílígí ınfraqūrylymdy jańǵyrtuǵa tíkeleı baılanysty ekenín túsínemíz. Sondyqtan bíz tek aǵymdaǵy qyzmet kórsetumen ǵana shektelmeı, qazandyqtardy jańartu men jańa jobalardy ázírleumen aınalysyp jatyrmyz. Qazírgí uaqytta taǵy jıyrma shaǵyn qazandyqty qaıta jańartu úshín jobalyq-smetalyq qūjattama daıyndalyp jatyr. Būl jobalardy íske asyru 2026–2028 jylǵa josparlanǵan», – dep qosty Ledentsov.
2025 jyly kásíporynnyń óz qarajaty esebínen jabdyqtardy jańǵyrtu boıynsha auqymdy jūmystar júrgízíldí. Toǵyz qazandyqta 12 qazandyq agregaty auystyryldy, tórt nysanda toǵyz janarǵy jańartylyp, on alty qazandyqta 48 sorǵy almastyryldy. Sonymen qatar bes nysanda 11 syıymdylyq pen boıler jańartylyp, «Qarasu» men «Kokkınakı» shaǵyn qazandyqtary qaıta jańǵyrtyldy. «Premera» qazandyǵynda tútín mūrjasyn auystyra otyryp kúrdelí jóndeu júrgízíldí. Sondaı-aq alty qazandyqta 12 esepke alu qūrylǵysy ornatylyp nemese jańartyldy.
Būdan bólek, byltyr jergílíktí byudjet qarajaty esebínen qaladaǵy 15 shaǵyn qazandyqqa rekonstruktsıya jūmystary júrgízíldí.