Qazaqstan Respublıkasy Ūlttyq ūlany 6506 áskerı bólímíníń oqu punktíne jańa tolyqtyrym kelgende erekshe árí sırek jaǵdaı anyqtaldy - 12 jas sarbaz būrynǵy synyptastar bolyp shyqty. Barlyǵy Almaty oblysy, Jambyl audany, Úmbetálí Káríbaev atyndaǵy orta mekteptí bírge támamdap, qazír qatarlasyp qyraǵylyqqa jáne áskerı qyzmetke daıyndalyp jatyr, - dep habarlaıdy aqshamnews.kz tílshísí.
Bólím basshylyǵynyń aıtuynsha, mūndaı jaǵdaı óte sırek kezdesedí. Sebebí, bír audannan bír áskerı bólímge túsu óz kezegínde úlken kezdeısoqtyq.
"Bíz bala kezímízden bírge ósíp kelemíz. Áskerge barudy sanaly túrde sheshtík. Eshkím qashqan joq, kerísínshe, baruǵa yntaly boldyq. Bízdí bír áskerı bólímge bólgende ózímíz de tań qaldyq. Qazír bír komanda sıyaqtymyz", - deıdí qatardaǵy jauynger Rasul Sautov.
Qazír jígítter oqu punktínde bastapqy áskerı daıyndyqtan ótíp, áskerı qyzmettíń negízderín meńgeríp jatyr. Komandırler olardyń ūıymshyldyǵy men bír-bíríne kómek kórsetuín joǵary baǵalaıdy.
"Bíz Otanymyzdy qorǵau úshín bírge tūrǵanymyzǵa maqtanamyz. Mūnda bíz bír-bírímízdí mekteptegídeı qoldaımyz. Osyndaı ūjdandy bírlík áskerı ómírge tezírek beıímdeluge kómektesedí", - deıdí qatardaǵy jauynger Marat Beıbarys.
Mūndaı mysaldar sırek kezdesedí, bíraq dál osy oqıǵalar patrıotızm men jauyngerlík bauyrlastyqtyń mektep tabaldyryǵynan bastalatynyn aıqyn kórsetedí. Búgíngí tańda osy jígítter bírlík, ózara qoldau jáne Otanǵa adaldyqtyń laıyqty úlgísí bolyp otyr.
Aıta keteıík, bastapqy áskerı dayarlyq kursy bír aıǵa sozylady. 2026 jylǵy 24 qańtarda merzímdí áskerı qyzmettegí jauyngerler áskerı ant qabyldaıtyn bolady, odan keıín Shymkent qalasynda qoǵamdyq tártíptí saqtau boıynsha qyzmetín atqarudy bastaıdy.