Ekibastuz qalasynda 17 jastaǵy jasóspirim ul men qyzdyń qaıtys bolýyna baılanysty qylmystyq ister qozǵalyp, tergeý amaldary bastaldy, dep habarlaıdy Aqshamnews.kz tilshisi.
Pavlodar oblystyq polısıa departamentiniń málimetinshe, árbir oqıǵa jeke-jeke qaralyp jatyr. Tergeý barysynda jasóspirimderdiń mundaı qadamǵa barýyna ne sebep bolǵany jáne oqıǵanyń barlyq mán-jaıy anyqtalýda. Qaıǵyly jaǵdaılar ártúrli ýaqytta tirkelgenimen, marqumdardyń bir-birimen burynnan tanys bolǵany belgili boldy.
Pavlodar oblysynyń bala quqyqtary jónindegi óńirlik ýákili Saýle Shakenevanyń aıtýynsha, jasóspirimder 2008 jyly týǵan, áleýmettik jaǵdaıy jaqsy, tolyq otbasylarda tárbıelengen. Ul bala Ekibastuz qalasyndaǵy mektepterdiń birinde 11-synypta oqyǵan, al qyz jergilikti kolejdiń birinshi kýrs stýdenti bolǵan.
Aldyn ala málimetterge sáıkes, árqaısysy óz úılerinde qaıtys bolǵan. Olardy jaqyn týystary taýyp alǵan. Ýákildiń aıtýynsha, jasóspirimder buryn bir synypta oqyp, dostyq qarym-qatynasta bolǵan.
Oqý oryndarynda býllıng derekteri tirkelmegen, sondaı-aq olar psıhologtardyń baqylaýynda bolmaǵan jáne arnaıy esepte turmaǵan. Áleýmettik jelilerde taraǵan aqparatqa sáıkes, qyz balanyń ólimi jasóspirim uldyń qazasynan eki kún ótken soń bolǵan.
Qazirgi ýaqytta oqıǵaǵa qatysty tergeý jumystary jalǵasyp jatyr.