Qoǵamnyń damuy eń aldymen adam kapıtalynyń sapasyna baılanysty. Al básekege qabílettí, qūqyqtyq sauatty, kásíbı bílímí myqty azamat qalyptastyrudyń negízgí tetígí – bílím beru júıesí. Osy tūrǵydan alǵanda, jańa Konstıtutsıyada belgílengen basymdyqtardy bílím salasyndaǵy naqty míndettermen sabaqtastyrudyń mańyzy zor.
Osy máseleler Almatyda ótken qalalyq semınarda keńínen talqylandy. Almaty memlekettík bıznes kolledjíníń bazasynda «Qazaqstan Respublıkasynyń jańa Konstıtutsıyasy: bílím beru jáne adamı kapıtaldy damytu» taqyrybynda ūıymdastyrylǵan jıynǵa qaladaǵy kolledjderdíń 250-ge juyq dırektory men dırektordyń orynbasary qatysty.
Ís-sharany Almaty qalasy Bílím basqarmasy ūıymdastyrdy. Semınardyń basty maqsaty – jańa Konstıtutsıyanyń negízgí erejelerín túsíndírumen qatar, onyń bílím beru júıesí men adamı kapıtaldy damytudaǵy rólín aıqyndau. Jıyn barysynda tehnıkalyq jáne kásíptík bílím berudíń jańa konstıtutsıyalyq basymdyqtardy íske asyrudaǵy ornyna erekshe nazar audaryldy.
Almaty memlekettík bıznes kolledjíníń dırektory Aınūr Mūqajanova bílím beru ūıymdarynyń míndetí tek kásíbı maman dayarlaumen shektelmeıtínín atap óttí. Onyń aıtuynsha, búgíngí student – erteńgí eńbek naryǵynyń mamany ǵana emes, qoǵamnyń belsendí múshesí. Sondyqtan jastardyń kásíbı bílímímen qatar, qūqyqtyq sauatyn, azamattyq mádenıetín jáne el aldyndaǵy jauapkershílígín qalyptastyruǵa basymdyq beríluí qajet.
– Konstıtutsıya – memlekettíń írgetasy, azamattardyń qūqyqtary men bostandyqtarynyń kepílí árí elímízdíń bolashaǵyn aıqyndaıtyn negízgí qūjat. Al adamı kapıtaldy damytuda jastardyń orny erekshe. Kásíptík-tehnıkalyq bílím beru – jastardyń sūranysqa ıe mamandyq alyp, eńbek naryǵynda óz ornyn tabuyna múmkíndík beretín mańyzdy baǵyt, – dedí Aınūr Mūqajanova.
Zań ǵylymynyń doktory, professor Erkín Dúısenov Konstıtutsıyany íske asyrudyń mańyzdy sharttarynyń bírí – onyń negízgí erejelerín ár azamatqa túsíníktí túrde jetkízu ekenín aıtty.
– Qalada bílím beru salasynyń, onyń íshínde kolledj basshylarynyń qatysuymen semınardyń ótuí Konstıtutsıyany íske asyru úderísíníń bastalǵanyn kórsetedí. Jańa Konstıtutsıyada bekítílgen ıdeyalar men qaǵıdattardy qoǵamǵa jetkízushílerdíń qatarynda eń aldymen pedagogter tūr, – dedí professor. Onyń aıtuynsha, būl baǵyttaǵy jūmystyń ekí mańyzdy qyry bar. Bírínshísí – azamattarǵa Ata zańnyń negízgí normalaryn túsíndíru bolsa, ekínshísí – qoldanystaǵy zańnamany jańa Konstıtutsıyaǵa sáıkestendíru.
Jańa Konstıtutsıyanyń qabyldanuy bílím beru júıesíne de jańa míndetter júktep otyr. Onyń íshínde bílímníń qoljetímdílígí men sapasyn qamtamasyz etu, ǵylym men ınnovatsıyany damytu, jas ūrpaqtyń áleuetín arttyru sekíldí baǵyttar erekshe mánge ıe.
Dana SADYRQAN
Surettí túsírgen: Q.Qonysbaev