Senator Bıbígúl Jeksenbaı platformalyq jūmyspen qamtudy qūqyqtyq retteu jáne tsıfrlyq servıster arqyly jūmys ísteıtín azamattardyń qūqyqtaryn qorǵau máselelerín kóterdí, – dep habarlaıdy aqshamnews.kz tílshísí.
Deputat óz saualynda sońǵy jyldary Qazaqstanda onlaın-platformalar arqyly, ásírese jetkízu jáne jolaushylar tasymaly salasynda jūmyspen qamtu qarqyndy damyp kele jatqanyn atap óttí. Sarapshylardyń baǵalauynsha, 394 myńǵa juyq azamat tsıfrlyq servıster arqyly tabys tauyp otyr, al ınternet-platformalardy oryndaushylardyń jalpy sany kóbeıe túsude.
Saualda platformalyq oryndaushylarda negízgí eńbek kepíldíkteríníń joqtyǵyna, sonyń íshínde tabystyń tūraqsyzdyǵyna, saqtandyrudyń bolmauyna, daulardy sheshudíń ashyq tetíkterí men platformalar tarapynan qabyldanatyn bírjaqty sheshímderden qorǵaudyń joqtyǵyna erekshe nazar audaryldy. Osyǵan baılanysty, deputat atap ótkendeı, halyqaralyq tájírıbe būl salany júıelí retteuge kóshu qajettígín kórsetíp otyr.
«Tsıfrlyq jáne salyqtyq ınfraqūrylymdy retteu boıynsha memlekettík júıeler men platformalar arasyndaǵy ıntegratsıyany retke keltíríp, aqparattyq qatelíkterden tuyndaǵan barlyq negízsíz bereshekter men ósímpūldardy avtomatty túrde joyu tetígín engízudí qarastyru kerek. Salyqtyq júktemení jeńíldetu úshín áleumettík tólemderdí esepteu kezínde shyǵyndardy, yaǵnı janarmaı, kólík jóndeudí shegeríp tastau ádístemesín de qarastyrudy oılastyru kerek. Qūqyqtyq mártebe jáne tarıftík kepíldíkter baǵytynda platformalyq jūmystyń erekshelíkterín eskeretín jeke zańnamalyq akt ázírleudí, onda «táuelsíz qyzmetker» mártebesín bekítíp, eń tómengí saǵattyq tólem standarttaryn engízudí qarastyru kerek. Oryndaushylardy jūmys kezíndegí jazataıym oqıǵalardan, jol-kólík oqıǵasynan, jaraqat jáne t.b. míndettí ūjymdyq saqtandyru platformalarymen bírlese joldaryn qarastyru kerek. Platformalardy tapsyrys bólu prıntsıpterín ashuǵa jáne akkaunttardy būǵattau sheshímderín adamnyń qatysuymen qaıta qarauǵa múmkíndíkterdí qarastyru kerek», - dep atap óttí senator.
Sózíníń sońynda senator būl salada júıelí zańnamalyq sharalardy ázírleu eńbek naryǵynyń ashyqtyǵyn arttyruǵa, azamattardyń qūqyqtaryn qorǵaudy qamtamasyz etuge jáne eldegí platformalyq ekonomıkanyń tūraqty damuyna jaǵdaı jasauǵa múmkíndík beretínín basa aıtty.