Almaty oblysyndaǵy tasjolda adam ólimimen aıaqtalǵan jol-kólik oqıǵasy boldy, - dep habarlaıdy Aqshamnews.kz tilshisi.
Almaty oblystyq polısıa departamentiniń baspasóz qyzmetiniń dereginshe, apat «Almaty – Óskemen» avtojolynyń 94-shaqyrymynda bolǵan.
«Aldyn ala málimet boıynsha, Changan markaly avtokólik júrgizýshisi rólge ıe bola almaı, bir baǵytta kele jatqan júk kóliginiń tirkemesine soqtyǵysqan. Soqqydan keıin jeńil kólik ınersıamen jol jıegindegi qorshaýǵa soǵylǵan. Artynsha Toyota Estima kóligi Changan-men soqtyǵysyp, keıin ınersıamen jol jıeginde turǵan tirkemege baryp soǵylǵan", - delingen habarlamada.
Sonymen qatar soqqynyń qatty bolǵany sonshalyq, Changan avtokóliginiń qozǵaltqyshy qarsy baǵytqa ushyp baryp, ol jaqta kele jatqan Ford Focus kóligimen janasqan.
Jol apaty saldarynan Changan kóligindegi eki jolaýshy oqıǵa ornynda kóz jumdy. Atalǵan avtokóliktiń júrgizýshisi jáne Toyota Estima júrgizýshisi túrli jaraqattarmen aýrýhanaǵa jetkizildi.
Polısıa qyzmetkerleri qylmystyq is qozǵap, bolǵan oqıǵanyń barlyq mán-jaıyn anyqtaý úshin jan-jaqty tergeý júrgizip jatyr.