Būl turaly Prezıdent Jambyl oblysynyń jūrtshylyǵymen kezdesuínde aıtty.
"Keshe Bauyrjan Momyshūlynyń tuǵanyna 115 jyl toldy. Dańqty qolbasshynyń naǵyz erlík joly elímízben qatar, shetelderde óte tanymal.
Halqymyz ony qaharman tūlǵa retínde qūrmet tūtady. Bíraq áıgílí batyrǵa resmı túrde "Halyq qaharmany" ataǵy berílmegen. Oblys jūrtshylyǵy, zıyaly qauym ókílderí, típtí, jastarymyz da osy máselení kóteríp júrgenín bílemíz. Tarıhı ádíldíktí qalpyna keltíruímíz kerek.
Sondyqtan men Memleket basshysy retínde Bauyrjan Momyshūlyna "Halyq qaharmany" ataǵyn beru turaly sheshím qabyldadym. Tıístí Jarlyqqa búgín qol qoıdym.
Batyrdyń esímí naǵyz otanshyldyq pen óshpes erlíktíń sımvoly retínde árdaıym kópke úlgí-ónege boluǵa tıís.Baukeńníń erlígí jaı ańyz emes, būl – naqty qūjattarmen dáleldengen, Ūly Otan soǵysyna qatysqan batyrlar moıyndaǵan sózsíz erlík.
Elge erlígímen tanylǵan, eńbegí síńgen azamattaryn baǵalaı bílgen jūrt eshqashan ūtylmaıdy", - dedí Prezıdent.
Eske salaıyq, 24 jeltoqsan - Bauyrjan Momyshūlynyń tuǵan kún. Ol – qazaq halqynyń jauyngerlík ruhyn, batyrlyq bolmysyn jáne parasatty oılau mádenıetín álemge tanytqan bíregeı tūlǵa. Aqshamnews.kz tílshísí batyrdyń ómíríne qatysty kópshílík bíle bermeıtín jáne qyzyqty derekter toptamasyn ūsynady.
Bauyrjan Momyshūly turaly ne belgílí?
Ol 1910 jylǵy 24 jeltoqsanda Jambyl oblysy, Jualy audany, Qarabastau auylynda dúnıege kelgen. 1932 jyly áskerge shaqyryldy. Orta Azıya áskerı okrugí 3-shí Túrkístan atqyshtar dıvızıyasynyń 14-shí tauly atqyshtar polkínde bír jyldyq kursty támamdaǵannan keıín vzvod komandırí qyzmetín atqardy.
1936 jyly Qıyr Shyǵysta 105-shí atqyshtar dıvızıyasynyń 315-shí atqyshtar polkínde artıllerıyalyq dıvızıon komandırí bolyp qyzmet ettí. 1938 jyly Hasan kólí mańynda japondyqtarmen bolǵan shaıqastarǵa qatysty. 1940 jylǵy aqpanda Kıev aıryqsha áskerı okrugíne auystyrylyp, 24-shí atqyshtar dıvızıyasynyń 406-shy atqyshtar polkínde shtab bastyǵynyń kómekshísí qyzmetín atqardy. 1941 jylǵy qańtarda Orta Azıya áskerı okrugíne jíberílíp, Qazaq KSR áskerı komıssarıatynyń áskerden tys dayarlau bólímíne aǵa nūsqaushy bolyp taǵaıyndaldy.
1941 jyly qazaqtyń 316-shy dıvızıyasy general Panfılovtyń qolbasshylyǵymen Volokolamsk baǵytynda Máskeudí qorǵady. 1941 jylǵy 16-18 qarashada aǵa leıtenant Bauyrjan Momyshūlynyń batalony Matrenıno auylynda dıvızıyadan bólíníp qorǵanys jasady. Kombat sheber basshylyǵynyń arqasynda jaudy osy shepte úsh kúnge tejep, tórtínshí kúní batalondy qorshaudan aman alyp shyqty.
Qarasha aıynyń sońynda polk komandırí bolyp taǵaıyndaldy. Kapıtan Bauyrjan Momyshūly Keńes Odaǵynyń Batyry ataǵyna ūsynylsa da, būl ataq oǵan tek dúnıeden ótkennen keıín ǵana beríldí. 1945 jylǵy qańtarda K. E. Voroshılov atyndaǵy joǵary áskerı akademıya janyndaǵy ofıtserler qūramyn jetíldíru kurstaryn ayaqtaǵan soń, 2-shí Baltyq maıdany, 6-shy gvardıyalyq armıya, 2-shí gvardıyalyq atqyshtar korpusy, 9-shy gvardıyalyq atqyshtar dıvızıyasy komandıríníń orynbasary qyzmetíne taǵaıyndaldy. Alaıda 1945 jylǵy 28 qańtardan soǵystyń sońyna deıín dıvızıya komandıríníń míndetín atqardy.
1946 jylǵy qańtarda K. E. Voroshılov atyndaǵy Joǵary áskerı akademıyaǵa jíberíldí. 1950 jylǵy qarashadan bastap V. M. Molotov atyndaǵy Keńes armıyasynyń tyl jáne jabdyqtau áskerı akademıyasynda jalpy taktıka jáne operatsıyalyq óner kafedrasynyń aǵa oqytushysy boldy.
1955 jylǵy jeltoqsanda zapasqa shyǵaryldy. Almatyǵa oralǵan soń ómírín tolyqtaı ádebı shyǵarmashylyqqa arnady. 1982 jylǵy 10 mausymda Almatyda qaıtys boldy. Kensaı zıratyna jerlendí. Keńes Odaǵynyń Batyry ataǵy 1990 jylǵy 11 jeltoqsanda beríldí.