Konstıtutsıyalyq reforma jóníndegí komıssıyanyń 12-shí otyrysy barysynda Qazaqstan Respublıkasy Konstıtutsıyalyq Soty tóraǵasynyń orynbasary Baqyt Nūrmūhanov kelíp túsken ūsynystardyń qorytyndylary negízínde jańa Ata Zań jobasyna engízílgen qosymsha normalar turaly habarlady.
Onyń aıtuynsha, negízgí baǵyttardyń bírí – tūrǵyn úıge qol sūǵylmaushylyq kepíldígín kúsheıtu. Baqyt Nūrmūhanov 28-baptyń
1-tarmaǵynda tek tūrǵyn úıden aıyruǵa ǵana emes, sottyń sheshímínsíz odan shyǵaruǵa da jol bermeıtín tolyqtyru kózdelgenín atap óttí. Tūrǵyn úıge basyp kiruge, ony qarap-tekseruge, tintuge zańda belgílengen jaǵdaıda jáne kózdelgen tártippen jol beriledi.
Taldau qorytyndylary boıynsha jańa Konstıtutsıyanyń kúshíne enu jáne 1995 jylǵy Konstıtutsıyanyń qoldanysyn toqtatu merzímderín reglamentteıtín normalar qosymsha kózdelgen. Jekelegen erejeler bírpalataly Qūryltaıǵa kóshu jáne onyń saılauyn ótkízu máselelerín retteıtín bolady. Spıker normalardyń basqa bólígí lauazymdy tūlǵalardy taǵaıyndauǵa jáne jańa memlekettík organdardy qalyptastyruǵa qatysty ekenín atap óttí.
«Konstıtutsıyalyq Keńes pen Konstıtutsıyalyq Sottyń būryn qabyldanǵan normatıvtík qaulylary Ata zańǵa qaıshy kelmeıtín bólígínde zańdy kúshín saqtaıtynyn atap ótkím keledí», – dedí Baqyt Nūrmūhanov.
Sońynda ol joba mátínderíníń pysyqtalǵany turaly habarlady. Spıkerdíń aıtuynsha, Konstıtutsıya jobasynyń memlekettík jáne orys tílderíndegí mátínderí barynsha jetíldírílgen.
«Olarda termınologıyalyq jáne semantıkalyq bírízdílík qamtamasyz etílgen. Qūqyqtyq normalardyń tūjyrymdamalary qoljetímdí jáne olardyń mazmūny barshaǵa túsíníktí etíp jazylǵan. Būl baǵytta zańgerler men lıngvıst mamandardan qūralǵan jūmys toptarynyń úlken jūmysyn erekshe atap ótkím keledí. Jańa Konstıtutsıyanyń pysyqtalǵan jobasy Komıssıya men jūmys toptarynyń otyrystarynda jan-jaqty talqylanyp, qoldau tapty. Komıssıya músheleríníń azamattarmen jáne zań qoǵamdastyǵy ókílderímen ótkízgen kezdesulerínde de oń píkírler aıtyldy», - dep qorytyndylady Baqyt Nūrmūhanov.
