Aqtóbede qalalyq jáne oblystyq balalar auruhanalary dūrys em kórsetpegení úshín nauqas balanyń otbasyna 10 mıllıon teńge moraldyq ótemaqy tóleıtín boldy, dep habarlaıdy Aqshamnews.kz tílshísí "Dıapazon"-ǵa sílteme jasap.
Oqıǵa 2023 jyly bolǵan. Tórt jasar qyz balaǵa bír jeke klınıkada "íríńdí otıt" dıagnozy qoıylsa, ekínshísínde "sol jaq bet júıkesíníń nevralgıyasy" degen qorytyndy jasalǵan. Keıín ol qalalyq balalar auruhanasyna jíberílíp, dárígerler íríńdí otıt kezínde jasauǵa bolmaıtyn fızıoem taǵaıyndaǵan. Osydan soń balanyń jaǵdaıy nasharlaı túsken.
Keıíngí em oblystyq balalar auruhanasynda jalǵasqanymen, qyz bala ūzaq uaqyt antıbıotıksíz qalyp, tek tańu jūmystary ǵana júrgízílgení aıtylady. Dárígerler konsılıumnan keıín emdeu taktıkasyn anyqtaǵanymen, jaqsarudyń belgísí bolmaǵan. Aqyry anasy balasyn óz betímen Almatydaǵy "Aqcaı" respublıkalyq auruhanasyna aparyp, emín sonda jalǵastyrǵan.
Balanyń anasy Aqtóbedegí qalalyq jáne oblystyq balalar auruhanalaryn dūrys medıtsınalyq kómek kórsetpedí dep sotqa beríp, moraldyq zıyandy óteudí talap etken. Saraptama qorytyndysyna sáıkes, emníń uaqytynda kórsetílmeuí ortańǵy qūlaq ınfektsıyasyna, basíshílík asqynularǵa ákelíp, nátıjesínde balaǵa bas súıegíne rezektsıyalyq trepanatsıya jasalǵan.
Qazír balanyń bír qūlaǵy múlde estímeıdí, ekínshí qūlaǵynda tūraqty shu bar. Dárígerler oǵan I dárejelí estu qabíletíníń joǵaluy dıagnozyn qoıǵan.
Sot sheshímí boıynsha, aldymen yuvenaldy sot ekí auruhanany da 5 mıllıon teńgeden tóleuge míndettegen. Apellyatsıyadan keıín sot alqasy būl sheshímdí kúshínde qaldyryp, ekí medıtsınalyq ūıymnyń da bílíksíz kómegí balanyń jaǵdaıyn ushyqtyrǵanyn atap óttí. Nátıjesínde auruhanalar jalpy somasy 10 mıllıon teńge ótemaqy tóleıdí.