Jaz — balalar úshín asyǵa kútken demalys mausymy. Alaıda būl kezeńdí qyzyqty árí mazmūndy etíp ūıymdastyru ata-ana úshín bír mezgílde jauapkershílík pen qıyndyqqa aınalady. Qalanyń qym-quyt tírshílígínde ata-analar jūmystan bosamaı, balalar bolsa uaqytty kóbíne telefon men gadjetke telmíríp ótkízetíní taǵy bar.
Endeshe, jazǵy demalysty tıímdí ótkízudíń naqty joldaryna toqtalaıyq.
Nelíkten jazǵy demalysty aldyn ala josparlau mańyzdy?
• Balanyń uaqyty bosqa ketpeuí úshín;
• Qauípsízdík talaptaryn eskeríp, senímdí orta qalyptastyru úshín;
• Jańa bílím men daǵdyny oıyn túrínde meńgeruíne múmkíndík beru úshín;
• Ár balanyń qabíletí men qyzyǵushylyǵyna saı orta tańdau úshín.
Eń aldymen Almaty mańyndaǵy jazǵy lagerlerge sholu jasap kórudí jón sanadyq. Olardyń dení - jekemenshík lagerler.
Almaty qalasy men mańynda ornalasqan balalarǵa arnalǵan lagerlerdí tómendegídeı toptastyruǵa bolady:
1. Tabıǵattaǵy lagerler
Íle Alatauynda ornalasqan sondaı lagerlerdíń bíríne habarlasyp kórdík. Baǵdarlamada tauǵa joryq, katamaranmen júzu, shatyr tígu, ot jaǵu, kvestter, atqa mínu, sadaq atu, golf, aǵylshyn tílíndegí oıyndar bar.
Bólmelerde 4–6 orynǵa shaqtalǵan, 5 mezgíl tamaq beríledí.
Baǵasy: 10 kúnge ~210 000 ₸
2. Sporttyq lagerler
Olar negízínen futbol, júzu, karate, gımnastıkaǵa baǵyttalǵan. Balalar negízínen mūndaı lagerlerde kúndelíktí jattyǵu men kíshígírím jarystarda ózara baq synasyp kóredí.
Būlar negízínen energıyasy kóp, sportty jaqsy kóretín balalar úshín taptyrmaıtyn orta. Artyqshylyǵy, mūnda balalar tártípke úırenedí, dene shynyqtyryp, demalysty densaulyq úshín paıdaly etíp ótkízedí.
Almaty mańynda Baǵanashyl shıpajaıynda ornalasqan futbol lagerleríníń bíríníń baǵyt-baǵdaryn, baǵasyn bílíp kórdík. Būl jer dop teuíp, futbol oınaǵandy jaqsy kóretín balalar úshín qyzyqty eken. Jyl saıyn demalys orny 10 shílde men 24 shílde aralyǵynda balalardy qabyldaıdy. Jas futbolshylar úshín tórt mezgíl tamaq beríledí. Mūnda balalar tańdy jattyǵu jasaudan bastaıdy. Odan bólek futbol alańynda kúníne ekí ret jattyǵyp, basseınde de jattyǵady.
Lager aumaǵy kúzetíledí, qajettí medıtsınalyq personaly da bar. Ata-analary uaıymdamas úshín balalarynyń ne ístep, qaı jerde júrgenderíníń bárí onlaın-chatta esebí berílíp otyrady. Balalardyń jattyǵuyn ótkízíp, shynyǵu sabaqtaryn Almatynyń tájírıbelí jáne beldí jattyqtyrushylary qadaǵalaıdy.
Baǵasy: 10 kún boıy kúndíz ǵana keletín bolsa -170.000 teńge
10 kún boıy lagerde qalatyn bolsa - 230 000 tg.
3. Shyǵarmashylyq lagerler
Suret saluǵa, muzykaǵa, bı men teatrdan habary balalarǵa arnalǵan lagerler de bar. Olardyń maqsaty - balanyń kórkemdík qabíletín damytu.
Mūndaı ortada balalar sahnalyq qoıylym qoyudy, kórme ótkízudí úırenedí.
4. Tíldík lagerler
Balanyń aǵylshyn ne basqa shet tíldí úırenuíne qyzyǵushylyǵyn arttyratyn mūndaı lagerlerde balalar ózderíne qyzyqty orta qalyptastyra alady. Mūndaı ortada balalardyń tíldí oıyn arqyly úırenuíne múmkíndík mol.
Maqsaty: Balanyń tíldí úırenuge qyzyǵushylyǵyn oyatu
Artyqshylyǵy: Shet tílín tabıǵı qabyldau, sóıleu mashyǵyn damytu
5. Etnolager: Ūlttyq tárbıe men dástúrdí síńíru
Osyndaı baǵytty ūstanyp otyrǵan lagerlerdíń bírínen de baǵdarlamasy men baǵasyn sūrastyrdyq. Bata, besík jyry, maqal-mátel jattatyp, sheshendík ónerge de susyndatatyn lagerler bar. Bíz habarlasqan sondaı lagerlerdíń bírí balalarǵa qolónerdí de úıretedí eken. Balalar atqa otyryp kóredí, ūlttyq oıyndarmen de tanysatyn kórínedí.
Tamaqtanu: 6 mezgíl
Baǵasy: 135 000 ₸
Artyqshylyǵy: Tamyryn tanıtyn, ūlttyq bolmysqa baı bala tárbıeleu.
Lagerlerdíń bírnesheuíne habarlasa kele, jekemenshík jazǵy lagerlerdíń eń arzan degení 85 myń men 100 myńnyń arasynda, al odan qymbatyraqtarynyń baǵasy 300 myńǵa juyqtaıdy. Qaltaǵa salmaq túsetíní bolmasa, jazǵy lagerlerdíń túrleríne qaraı baǵalary da, baǵdarlamalary da san aluan. Barlyǵy bala qauípsízdígín basty nazarǵa qoıyp otyr. Kópshílígíníń aumaǵy kúzetíledí. Demalysqa baratyn balalardyń ata-analarymen 24/7 kerí baılanys ornatylǵan.
Medreseler de balalardy jazdy jaı ótkízbeuge shaqyrady
Balasynyń dínı sauatyn arttyryp, ımanǵa qaraı beıímdegísí keletín ata-analar balalaryn meshítterge, medreselerge beríp jatady. Onda balalar Qūran álíppesímen tanysyp, ıslam ádebín úırenedí. Negízínen olardyń dení kurs retínde ótedí. Máselen, QMDB-ǵa qaraıtyn meshítterdíń bíríne habarlasyp kórdík. Sóıtsek, mausymnyń ekínshí aptasynan bastap, "Imanı jaz" degen taqyryppen 10-15 jas aralyǵyndaǵy ūl jáne qyzdar úshín "Dínı sauat ashu" kurstary ótedí eken. Qatysu tegín. Basty talap: ata-analardyń jazbasha ótíníshí, balanyń qūjatqa qajettí suretí jáne tuu turaly kuálíktíń kóshírmesí. Būl jerde balalar kúníne ekí saǵat bílím alyp, úıleríne qaıtady. Dínı sauatty ashatyn, ádep sabaqtaryn oqytatyn jekemenshík dínı mekemeler de bar. Olardyń bárí tegín oqytpaıdy.
Mektep janyndaǵy jazǵy lagerler
Almaty qalasynda mausym aıynan bastap mektep janyndaǵy lagerler óz jūmysyn bastaıdy. Qazírgí tańda megapolıstegí 200-den astam mektep jazǵy demalysty mazmūndy ūıymdastyruǵa belsendí daıyndyq júrgízíp jatyr.
Qalaı qatysuǵa bolady?
Ata-analar balasyn lagerge mektep ákímshílígíne júgínu arqyly tírkeı alady.
Qatysu – tolyqtaı tegín.
Baǵdarlama mazmūny:
• Zıyatkerlík jáne shyǵarmashylyq oıyndar
• Sporttyq jarystar men estafetalar
• Vıktorınalar men píkírsaıys klubtary
• Jazǵy tíl mektepterí
• «Jas ūlan» jáne «Jas qyran» baǵdarlamalary
• Etnolager, ekolager, sporttyq lagerler túrínde arnaıy baǵyttar
Arnaıy baǵyttaǵy mektep lagerlerí:
• 6 mektepte — etnolager (kıíz úıde ūlttyq dástúr, qolóner, ádep)
• 24 mektepte — futbol, voleıbol, basketbol jáne ūlttyq sport jarystary
• 50 mektepte — ekologıyalyq mádenıet pen tabıǵatqa jauapkershílíkke baulıtyn ekolagerler
Balalar qauípsízdígí – basty nazarda
Almaty qalasy Bílím basqarmasynyń basshysy Saıran Saıfedenov atap ótkendeı:
• Barlyq mektep lagerlerí medıtsınalyq kabınettermen jabdyqtalady
• Mektep dırektorlarymen bírge sanıtarlyq-epıdemıologıyalyq baqylau jáne Tótenshe jaǵdaılar departamentí ókílderíníń qatysuymen daıyndyq jınalystary ótkízíldí
• Balalarǵa:
• Su aıdyndaryndaǵy qauípsízdík,
• Jolda, qoǵamdyq oryndarda ózín ūstau erejelerí boıynsha
arnaıy aldyn alu sabaqtary ūıymdastyrylady
Qosymsha bílím beru jáne IT-lagerler
Almatyda jaz mezgílínde mektepten tys qosymsha bílím beretín mekemeler bazasynda beıíndí jáne kóshpelí lagerler de íske qosylady.
Qaıda ūıymdastyrylady?
• «Shabyt» ortalyǵy
• «Samǵau» ortalyǵy
• №1 Oqushylar úıí
• Ekí ınnovatsıyalyq shyǵarmashylyq ortalyq
• Oqushylar saraıy jáne basqa da mekemeler
Baǵyttary:
• IT jáne ǵylymǵa qyzyǵushylyqty arttyratyn lagerler:
Jobalyq qyzmet, tájírıbeler men eksperımentter
• Shyǵarmashylyq baǵyttaǵy kurstar:
Shahmat, vokal, bı, kúres, sahnalyq óner jáne t.b.
Ár ata-ana balasynyń jazǵy demalysynyń kóńíldí, paıdaly árí esten ketpesteı ótuín qalaıdy. Al ony aldyn ala ūıymdastyru jáne qauípsíz ótkízu ata-analardyń jauapkershílígí men tańdauy.