Almaty qalasynda «Baıqa! Alayaq!» atty jańa detektıvtík komedıyanyń premerasy óttí, – dep habarlaıdy aqshamnews.kz tílshísí.
Fılmníń rejısserí - Darhan Sarkenov, al jobanyń ınvestory - Tolqyn Film Fund jeke kınoqory. Kartına 19 nauryzdan bastap Qazaqstannyń barlyq kınoteatrlarynda kórsetíle bastady.
Fılm qazírgí zamandaǵy ózektí taqyrypty - kıberalayaqtyq pen adamdardyń sengíshtígín qozǵaıdy. Oqıǵa jelísíníń ortasynda - onlaın qylmystarmen kúres bólímínde jūmys ísteıtín polıtsıya qyzmetkerí. Alaıda taǵdyrdyń tálkegímen onyń óz ata-anasy alayaqtardyń qūrbanyna aınalady.
Tolqyn Film Fund bas dırektory Ernar Qūrmashevtíń aıtuynsha, fılm tek áleumettík máselení kóteríp qana qoımaı, naǵyz otbasylyq tuyndyǵa aınalǵan:
«Kóbíne onlaın alayaqtardyń qūrbany qart jastaǵy adamdar bolyp tabylady. Būl fılmde - dál sondaı oqıǵa. Syujet boıynsha ata-ana balalary jınaǵan aqshany alayaqtarǵa beríp qoıyp, keıín bárín ózderí túzetuge tyrysady. Eger fılm kem degende bír adamdy alayaqtardan saqtandyrsa — demek, ol beker túsírílmegen», - deıdí Qūrmashev.
Qazaqstandaǵy venchurlyq model boıynsha tolyqmetrajdy fılmderge ınvestıtsıya salatyn alǵashqy jeke kınoqor úshín būl - ekínshí joba. Alǵashqysy – rejısser Álísher Ótevtíń “Dástúr: Terís bata” fılmí, ol prokatta 876 mln teńge jınaǵan. «Baıqa! Alayaq!» fılmínen de osyndaı joǵary nátıje kútílude.
Kórermen qyzyǵushylyǵyn rejısserdíń aty da arttyryp otyr. Darhan Sarkenov - otandyq kınonyń eń ónímdí rejısserleríníń bírí. Tek ótken jyldyń ózínde ol jetí fılm túsíríp, sonyń íshínde “Qolyńnan kelse alyp qash” atty hıtí prokatta mıllıardtan astam tabys tapqan.
Fılmde Quandyq Shákírjanov (“Jas emes jūbaılar”), Baqyt Álípbaeva (“Kúshík qūda”), Jazıra Erkín (“Qyzym”), Beksūltan Pílál (“Patrul”) jáne Jahan Otarǵalıev (“Djohan”) oınaıdy. Beksūltan úshín būl joba erekshe mańyzǵa ıe:
«Būl - meníń basty rólderdíń bírín somdaǵan alǵashqy írí jobam. Men alayaqtarǵa qarapaıym adamdar arasynan qūrbandar tabuǵa kómektesetín dropperdí oınaımyn», — dedí ol.
«Baıqa! Alayaq!» fılmí 19 nauryzdan bastap elímízdíń barlyq kınoteatrlarynda kórsetílude.
