Óńírlík kommunıkatsıyalar qyzmetínde «Almaty qalasynyń Otbasyn qoldau ortalyǵy» KMM dırektorynyń míndetín atqarushy Aqmoljan Zarıpov qatysqan brıfıng bolyp óttí. Ol mekeme jūmysynyń nátıjesí turaly bayandady. Spıkerdíń aıtuynsha, Ortalyq Almatydaǵy áleumettík qoldau júıesíníń mańyzdy buyny sanalady jáne qıyn jaǵdaıǵa tap bolǵan otbasylar men azamattarǵa keshendí kómek kórsetedí, – dep habarlaıdy aqshamnews.kz tílshísí.
«Bízdíń míndet – tek tuyndaǵan máselelerge jauap beru ǵana emes, olardyń aldyn alu. Bíz mekemearalyq ózara ís-qımyldy jolǵa qoıyp, otbasylardy jaǵdaıy tolyq túzelíp ketkenshe súıemeldeımíz», – deıdí Zarıpov.
Byltyr Ortalyq 1341 ótíníshtí qarastyryp, onyń 1283-ín oryndaǵan. Jūmys ayasynda 1566 memlekettík qoldau sharasy kórsetílgen. Mamandar 527 psıhologıyalyq jáne 325 zańgerlík keńes bergen. 2026 jyldyń basynan berí Ortalyqtyń túrlí qyzmetí 302 adam qamtydy, onyń íshínde psıhologıyalyq, qūqyqtyq jáne áleumettík kómek te bar.
Kóshpelí jūmysqa erekshe nazar audaryldy. Qalada bílím beru, densaulyq saqtau men qūqyq qorǵau salasynyń ókílderí qatysqan jedel toptar jūmys ísteıdí. Byltyr olar qoldauǵa mūqtaj otbasylarǵa 146 ret baryp qaıtqan.
«Mobıldí toptar jedel áreket etíp, atauly kómek kórsetuge múmkíndík beredí. Ár jaǵdaı boıynsha bír jylǵa deıíngí merzímge jeke súıemeldeu jospary ázírlenedí», – dep atap óttí spıker.
Ortalyq tsıfrlyq sheshímderdí de belsendí túrde engízíp jatyr. Áleumettík kómektí kórsetudíń FSM Social ıntegratsıyalanǵan júıesí ayasynda 3641 maman oqytudan óttí. Būl mekemearalyq ózara ís-qımyldyń tıímdílígín arttyryp, daǵdarysqa tap bolǵan otbasylardy der kezínde anyqtauǵa múmkíndík bergen.
Būdan bólek, auqymdy aqparattyq-túsíndíru jūmysy da qolǵa alyndy. Almatyda zorlyq-zombylyqtyń, bullıngtíń, stalkıng pen májbúrlep úılendírudíń aldyn alu máselesí boıynsha dáríster, trenıngter jáne studentter men mamandarǵa arnalǵan kezdesuler óte bastady. Ortalyqta otbasylardy qoldau men áleumettík qolaısyzdyqtyń aldyn alu boıynsha jūmys jalǵasatynyn, būl rette bar máselení erte anyqtap, halyqqa kómektíń qoljetímdílígín arttyruǵa basymdyq beríletíníne toqtaldy.