Bıylǵy 1 sáuírden bastap Qazaqstanda memlekettík qyzmetke qabyldaudyń jańa tártíbí kúshíne enedí. Ol baıqau rásímderín tolyq onlaın formatqa kóshíríp, avtomattandyrudy kózdeıdí. Óńírlík kommunıkatsıyalar qyzmetínde ótken baspasóz máslıhatynda QR Memlekettík qyzmet ísterí agenttígíníń Almaty qalasy boıynsha departamentí basshysynyń orynbasary Shynaraı Álímhan osylaı dep málímdedí, – dep habarlaıdy aqshamnews.kz tílshísí.
Onyń aıtuynsha, íríkteudíń barlyq kezeńderí eqyzmet.gov.kz portaly arqyly ótedí. Būl artyq byurokratıyany joıyp, adamı faktordyń áserín azaıtyp, elímízdíń barlyq óńíríndegí kandıdattarǵa teń múmkíndík beruge jol ashady. Baıqaudaǵy rásímderdíń merzímí 5–7 jūmys kúníne deıín qysqarady endí.
«Bíz memlekettík qyzmettíń jańa modelíne kóshíp jatyrmyz. Mūnda basty róldí formaldy rásímder emes, adamnyń naqty qūzyretterí atqarady. Būl ár kandıdatqa tūrǵylyqty jeríne nemese jeke baılanystaryna qaramastan óz kásíbı qabíletín dáleldeuge múmkíndík beredí», — deıdí Shynaraı Álímhan.
Jańashyldyqtyń bírí — aldyn ala testíleu múmkíndígí. Kandıdattar testtí aldyn ala nemese ótínísh qabyldau kezeńínde tapsyra alady. Būl daıyn kadrlyq rezerv qalyptastyryp, konkurs ótkízu protsesín jedeldetuge múmkíndík beredí. Zańnamany bíluge arnalǵan test konstıtutsıya, memlekettík qyzmet pen sybaılas jemqorlyqqa qarsy ís-qımyl turaly zańdar, sondaı-aq Ádep kodeksí sıyaqty 55 sūraqtan tūrady: Ótu úshín kemínde 30 dūrys jauap jınau qajet, árí ár blok boıynsha kemínde 5 dūrys jauap boluy tıís.
Sonymen qatar jańa júıede jeke qasıetterdí baǵalauǵa erekshe mán beríledí. Basshylyq lauazymdarǵa 10 qūzyret (onyń íshínde kóshbasshylyq pen strategıyalyq oılau), oryndaushylyq lauazymdarǵa 7 qūzyret baǵalanady. Al bastapqy deńgeıdegí qyzmetter úshín kandıdattardyń áleuetín anyqtauǵa baǵyttalǵan EQ–SQ–IQ modelí qoldanylady. Test nátıjelerí ámbebap bolyp sanalady jáne tómen deńgeıdegí lauazymdarǵa konkursqa qatysqanda da paıdalanyluy múmkín.
«Tsıfrlandyru bízge protsesterdí jyldamdatumen qatar, olardyń ashyqtyǵyn qamtamasyz etuge múmkíndík beredí. Ár sheshím túsíníktí bolyp, tekseríledí. Būl óz kezegínde azamattardyń memlekettík qyzmetke degen senímín arttyrady», — dep qosty ol.
Brıfıng barysynda Almatydaǵy 2025 jylǵy memlekettík qyzmettíń damu qorytyndylary da aıtyldy. Qalada 74 memlekettík organ jūmys ísteıdí, onda 3920 shtat bírlígí qarastyrylǵan, onyń 3488-í naqty toltyrylǵan. Jūmys deńgeıí shamamen 9%-dy qūraıdy. Júıede 15 sayası jáne «B» korpusynyń 3465 ákímshílík memlekettík qyzmetshísí eńbek etedí.
Kadr sapasyna erekshe nazar audarylady. Memlekettík qyzmetshílerdíń íshínde 185-í «Bolashaq» baǵdarlamasynyń túlekterí, 95-í shetelde bílím alǵan, 13-íníń ǵylymı dárejesí bar, 24-í Memlekettík basqaru akademıyasyn bítírgen. Sonymen qatar 14 maman óńírlík kadr rezervínen jūmysqa qabyldanǵan.
Jyl qorytyndysy boıynsha taǵaıyndaulardyń 81%-y íshkí konkurstar arqyly júzege asqan. Būl merıtokratıya qaǵıdatynyń íske asyrylyp jatqanyn kórsetedí. Barlyq memlekettík qyzmetshíler oqytudan ótken, 160 adam taǵylymdamadan, 126 qyzmetker synaq merzímínen tálímgerlíkpen ótken. Kadrlyq protsestíń barlyǵy «E-qyzmet» júıesí arqyly tolyq tsıfrlandyrylǵan.
Sondaı-aq 2025 jyly departamentke azamattardan 703 ótínísh kelíp túsken, būl ótken jylmen salystyrǵanda 65%-ǵa kóp. Tekseru nátıjesínde 614 qūqyq būzushylyq anyqtalyp, onyń 410-y joıylǵan, 33 ūsynys engízílgen. 2026 jyldyń bírínshí toqsanynda artyq jūmys uaqyty men demalysqa qatysty 55 memlekettík qyzmetshíníń qūqyqtary qalpyna keltíríldí.
«Bízdíń maqsat — qūqyq būzushylyqtardy anyqtau ǵana emes, olardyń sanyn barynsha azaıtu. Sondyqtan profılaktıkalyq jūmysty kúsheıtíp, qoǵammen ózara ís-qımyldy arttyryp, aldyn aluǵa basymdyq berdík», — dedí spıker.
Almatyda qoǵam ókílderí kíretín Ádep jóníndegí keńes jūmys ísteıdí. Bír jyl íshínde 10 otyrys ótkízílíp, 36 másele qaralyp, 164 ūsynym ázírlendí. Sonymen qatar BAQ-taǵy jarıyalanymdar men jūmys uaqyty rejımíníń saqtaluyna baqylau jasaıdy.
Memlekettík qyzmetterdíń sapasyna da erekshe kóńíl bólínedí. Qalada 47 qyzmet kórsetushí arqyly 365 túrlí qyzmet ūsynylady. 2025 jyly 20,2 mıllıonnan astam qyzmet kórsetílgen, onyń 87,67%-y elektrondy formatta. «eGov» Telegram-boty arqyly 663 ótínísh túsíp, olardyń bír bólígí oń sheshímín tapqan, qalǵandaryna túsíndírme berílgen.
Sonymen qatar departament sybaılas jemqorlyqtyń aldyn alu funktsıyalary berílgennen keıín būl baǵyttaǵy jūmysty kúsheıttí. Táuekelderge taldau júrgízílíp, memlekettík satyp alularǵa monıtorıng jasalyp, protsesterdí debyurokratıyalau jáne túrlí salalarda túsíndíru jūmystary júrgízílude.
2025 jyldyń qorytyndysy boıynsha Almatydaǵy memlekettík qyzmet júıesí tūraqty damyp kele jatqanyn kórsetedí. Al jańa íríkteu tetíkterín engízu onyń ashyqtyǵyn, kásíbılígín jáne tıímdílígín arttyruǵa baǵyttalǵan.