Qazaqstanda jyldyń ekí basty merekesí - Jańa jyl men Nauryz jaı ǵana demalys kúnderí emes, otbasylyq byudjetke túsíretín salmaǵy da bar. Ekeuí de jyldyń basy retínde erekshe kóńíl-kúı syılaıdy, halyq asyǵa kútedí. Degenmen, mereke saıyn qaltanyń jūqara túsetíní taǵy bar. Sarapshylardyń baǵalauy boıynsha, Jańa jylda adamdar negízínen syılyqtarǵa kóbírek shyǵyndalady. Al Nauryzda syılyqtan górí dastarhanǵa kóbírek aqsha jūmsalady eken. Dástúrlí taǵamdar ázírleumen bólek, tuystardy aralauǵa shyqqanda qazaq qūr alaqan barmaıtyny taǵy bar.
Bıylǵy jyly Nauryz Oraza aıtpen tūspa-tūs kelíp otyr, būl otbasylarǵa merekelík dastarhan men saparlardy tıímdí josparlap, shyǵyndardy bírtūtas bóluge múmkíndík beredí. Aqshamnews.kz tílshísí osy ekí merekeníń shyǵyndyq qūrylymyn, ūqsastyqtary men aıyrmashylyqtaryn saraptap kórdí.
Jańa jyl: dastarhany men erekshelíkterí
Jańa jyl dastarhanynyń ortasha qūny, az degende shamamen 70 myń teńge. Būl somaǵa 30-dan astam azyq-túlík kíredí:
Et jáne tauyq etí
Salattarǵa arnalǵan ıngredıentter (olıve, «shuba»)
Shūjyq, írímshík
Jemís-jıdek, táttíler, susyndar
Eskere ketetíní, jańa jyl negízínen otbasylyq mereke retínde kóbíne óz úıínde shaǵyn ortada atap ótíledí jáne resmı túrde 2–3 kúnge sozylady.
Nauryz: dástúrge negízdelgen dastarhan
Nauryz dastarhanynyń qūrylymy múlde bólek. Mūnda basty taǵam - Nauryz kóje, sondaı-aq bauyrsaq, et, qymyz, shūbat sıyaqty ūlttyq ónímder ūsynylady.
Sarapshylardyń esepteuínshe, Nauryz dastarhanynyń ortasha qūny:
Qarapaıym otbasy úshín: 30–50 myń teńge
Keń dastarhan (qonaq kóp bolsa): 50–80 myń teńge (eń az degende)
Nauryz – kópshílíkpen toılanatyn mereke, yaǵnı kórshí-qolań, tuys-tuǵan bas qosyp, arqa-jarqa bolatyn meıram. Sonymen qatar, Nauryz merekesíne beríletín demalys ta az emes, 5 kúnge sozylady. Áár úıdí aralap, «Nauryz kóje» dámín tatyp, qonaqjaılyq dástúrín jalǵastyruǵa uaqyt ta, múmkíndík te kóp.
Negízgí aıyrmashylyqtar
Óním túrí: Jańa jyl – assortımentí kóp, ımporttyq jáne qymbat tauarlar jıí alynady; Nauryz – ūlttyq taǵamdarǵa negízdelgen, salystyrmaly túrde qoljetímdí.
Merekelík ūzaqtyq: Jańa jylda negízínen jūrt saǵat 00:00 bolǵanyn kútse, Nauryz meıramyn bírneshe kún boıy toılaı beruge bolady.
Qonaq mádenıetí: Jańa jyl – jeke otbasy merekesí, Nauryz – kórshí-qolań men tuysqandardy shaqyru dástúrí.
Shyǵyn kólemí: Qonaq sany men dastarhannyń kólemíne jáne kúní būryn daıyndalatyn syılyqtarǵa baılanysty Nauryz da, Jańa jyl da árkímníń óz "qaltasyna" qaraı shyǵyndanuy sonshalyq bolmaq.
Ámıyanǵa áserí: sarapshylar keńesterí
Et strategıyasy: Nauryzǵa aqpanda, Jańa jylǵa qarashada satyp alyp, mūzdatyp qoısańyz, 20%-ǵa deıín únemdeuge bolady.
Kóterme bazarlar: Jarmalar, ūn, maı jáne konservílerdí kóterme bazardan alu qosymsha únemdeuge múmkíndík beredí.
Balalarǵa syılyq: Oıynshyq ornyna aqshalaı syılyq beru qarjylyq sauattylyqty damytady jáne qosymsha shyǵynnan qūtqarady.
Standartty esep boıynsha Jańa jyl dastarhany qymbatyraq kóríngenímen, Nauryzdaǵy qonaqjaılyq dástúrí men ūzaqtyǵy shyǵyndy arttyruy múmkín. Sondyqtan naqty qaı mereke «qymbat» ekení ár otbasynyń formatyna, qonaq sanyna jáne dastarhan kólemíne baılanysty anyqtalady.