QR Premer-Mınıstriniń tapsyrmasyna sáıkes, Almatyda beıindi basqarmalar, saýda departamenti men aýdan ákimdikteriniń ókilderinen turatyn arnaýly baqylaý toptary quryldy.
Baqylaý jaǵy iri saýda nysandaryn, bazarlar men úıge irgeles turǵan dúkenderdi qamtyǵan. Qazir qalada 51 bazar, 200-den astam sýpermarket pen shamamen 4,5 myń osyndaı shaǵyn saýda núktesi jumys isteıdi. Jyl basynan bastap áleýmettik mańyzy bar azyq-túliktiń tizimi 19-dan 31 ataýǵa deıin keńeıtildi.
Buǵan qosymsha kókónis pen jemis (qyzanaq, qıar, alma), ettiń túrleri, sút ónimderi, shaı, sondaı-aq balyqtyń bes túri engizildi. Jańa ónimderdiń barlyǵy baqylaýǵa alynyp, osyǵan baılanysty jetkizýshilermen jáne saýda jelilerimen júıeli jumys júrgizilip jatyr. 2026 jylǵy 5 qańtardan bastap QQS mólsherlemesi 12%-dan 16%-ǵa kóterilgenimen, Almatyda ÁMAT baǵasynyń kúrt ósýi tirkelgen joq.
Saýda jelileri negizinen tez ótetin taýarlar jaǵyn ýaqytyly qaıta baǵalap jatyr, áleýmettik mańyzy bar ónimderdiń baǵasy birqalypty. Qala ákimdiginde kóktemgi kezeńde ońtústik óńirlerden, sondaı-aq kórshiles Ózbekstan, Qyrǵyzstan men Tájikstannan qosymsha erte pisetin kókónis ákelýdi de josparlap otyrǵandaryn atap ótti.
Bul baǵa teńgerimin saqtap, naryqty jetkilikti mólsherde ónimmen qamtamasyz etýge múmkindik bermek. Qala bıligi áleýmettik mańyzy bar azyq-túliktiń baǵasyn baqylap otyrǵanyn, olardy turaqtandyrý jumysy jalǵasyn beretinin málimdeıdi.