Qazaqstanda ekínshí aı qatarynan azyq-túlík baǵasynyń tómendeuí baıqalady.
Úkímette Premer-mınıstrdíń orynbasary – ūlttyq ekonomıka mınıstrí Serík Jūmanǵarınníń tóraǵalyǵymen ótken keńeste ınflyatsıyanyń ózgeru dınamıkasy men baǵany tūraqtandyru sharalary qaraldy.
Sauda jáne ıntegratsıya mınıstrlígíníń málímetínshe, azyq-túlík ınflyatsıyasy ekínshí aı qatarynan tómendegen, baǵanyń 0,1% deńgeıíndegí deflyatsıyalyq úrdís saqtalyp otyr. Baǵa ósímíníń bayaulauyna áleumettík mańyzy bar azyq-túlík tauarlary aıtarlyqtaı áser etude. Jyl basynan berí būl tauarlardyń baǵasy 1,8%-ǵa óstí. Al ótken jyldyń sáıkes kezeńínde ósím 8,3%-dy qūraǵan. Yaǵnı, bıyl baǵa ósímí 4,6 ese tómen.
Ótken aptada qant 2,4%-ǵa, pıyaz 1,7%-ǵa, alma men sábíz 0,9%-ǵa, kúrísh 0,5%-ǵa, qoı etí 0,4%-ǵa arzandady. Al nan, makaron ónímderí, sary maı, tūz jáne shaı baǵasy ózgergen joq.
Sonymen qatar kúnníń suytuyna baılanysty qıyar baǵasy 4,6%-ǵa, qyryqqabat pen qyzanaq 3,7%-ǵa, kartop 2,4%-ǵa qymbattady. Aldaǵy qys jáne kóktem aılarynda jylyjaıda ósíríletín kókónísterdíń baǵasyn tūraqtandyru maqsatynda óndírushílermen tıístí memorandumǵa qol qoıylady.
Baǵany tūraqtandyrudyń tıímdí joldarynyń bírí – auyl sharuashylyǵy jármeńkelerí. Mūnda óndírushíler óz ónímderín tūtynushylarǵa tíkeleı ūsynady. Būdan bólek, 17–27 qazan aralyǵynda elímízdíń barlyq óńírínde «Bereke Fest» jáne «Republic Day» aktsıyalary ótude. Olarǵa 649 sauda nysany qatysuda. Aktsıyalar ayasynda satyp alushylarǵa kúndelíktí tūtynatyn tauarlar men sūranysqa ıe azyq-túlík ónímderí 50%-ǵa deıíngí jeńíldíkpen ūsynylady.
Keńes barysynda Serík Jūmanǵarın azyq-túlík ınflyatsıyasy ósken oblystardyń ákímdíkterín tyńdady. Sondaı-aq barlyq óńírge auyl sharuashylyǵy jármeńkeleríníń sanyn arttyryp, halyq kóp tūtynatyn azyq-túlík ónímderín qoljetímdí baǵamen jetkílíktí kólemde qamtamasyz etudí tapsyrdy.
