Májílíste jūmys berushílerdíń eńbek shartyn aınalyp ótíp, azamattarmen azamattyq-qūqyqtyq kelísím jasasu tájírıbesíne núkte qoyu máselesí kóteríldí, dep habarlaıdy aqshamnews.kz
Deputattar mūndaı kelísímder jūmysshylardy negízgí áleumettík kepíldíkterden tolyq aıyratynyn aıtty.
Bírínshí oqylymda qaralǵan zań jobasyna qatysty deputat Ashat Aımaǵambetov kóptegen jūmys berushíníń shyǵyndy azaıtyp, áleumettík míndettemelerden qashu úshín eńbek shartyn emes, azamattyq-qūqyqtyq kelísím (GPH) rásímdeıtínín atap óttí.
- Mūndaı jaǵdaıda qyzmetker eńbek tártíbíne baǵynady, grafıkpen jūmys ísteıdí, basshysy bar. Bíraq qaǵaz júzínde ol — “qyzmetker” emes, “merdíger”. Būl áleumettík kepíldíkterden tolyqtaı aıyrady, — dedí Aımaǵambetov.
Deputattyń aıtuynsha, azamattyq-qūqyqtyq kelísím boıynsha jūmys ísteıtín azamattar aqy tólenetín demalys ala almaıdy, áıelderge bosanu jáne bala kútímí boıynsha demalys berílmeıdí, zeınetaqy jarnalary tolyq audarylmaıdy, sondaı-aq míndettí medıtsınalyq saqtandyruǵa da qol jetkíze almaıdy.
Onyń aıtuynsha, endí būl tájírıbege qatań shekteu qoıylady. Eger eńbek qatynasynda eńbek shartyna tán kem degende bír belgí bolsa, azamattyq-qūqyqtyq kelísím jasauǵa tyıym salynady.
Deputat Arman Qalyqov ta bastamany qoldap, qandaı jaǵdaıda azamattyq-qūqyqtyq kelísím eńbek sharty retínde tanylatynyn naqtylaudy sūrady.
Eńbek jáne halyqty áleumettík qorǵau mınıstrlígíníń bírínshí vıtse-mınıstrí Askarbek Ertaevtyń aıtuynsha, Eńbek kodeksíníń 27-babyna sáıkes eńbek shartynyń negízgí úsh belgísí bar: qyzmetkerdíń belgílí bír mamandyq nemese bílíktílík boıynsha jūmys atqaruy, míndetterdí basshylyqqa baǵyna otyryp jeke oryndauy jáne tūraqty jalaqy aluy.
- Eger azamattyq-qūqyqtyq kelísím osy belgílerdíń bíríne sáıkes kelse, onda ol míndettí túrde eńbek sharty retínde rásímdeluí qajet. Mūny aldymen jūmys berushíníń ózí tekseruge tıís. Al memlekettík baqylaudy eńbek ınspektsıyasy júrgízedí, — dedí ol.
Vıtse-mınıstr qazír elde eńbek sharttaryn tírkeıtín bíryńǵaı júıe jūmys ísteıtínín, onda azamattyq-qūqyqtyq kelísímder de monıtorıng úshín júkteletínín aıtty.
- Júıede shamamen 300 azamattyq-qūqyqtyq kelísím bar. Eger ınspektsıya olardyń íshínde eńbek shartyna tán belgílerdí kórse, jūmys berushíge olardy eńbek shartyna auystyru turaly nūsqama beríledí, — dedí Ertaev.
Deputattar būl ózgeríster qabyldansa, on myńdaǵan azamat tolyq áleumettík jáne eńbek kepíldíkteríne qol jetkízetínín atap óttí.