Konstıtutsıyalyq reforma jóníndegí komıssıyanyń 12-shí otyrysynda «Auyl» partıyasynyń tóraǵasy Serík Egízbaev qoǵamnan kelíp túsken san myńdaǵan ūsynys-píkírler negízínde ázírlengen jańa Konstıtutsıya jobasyna qatysty óz kózqarasyn bíldírdí, - dep habarlaıdy aqshamnews.kz.
Óz sózínde spıker būl qūjattyń eldegí ózektí qoǵamdyq sūranystarǵa tolyq jauap beretínín, azamattardyń talap-tílegí eskerílgenín aıtty.
«Talqylau barysynda qoǵamnan kelíp túsken myńdaǵan ūsynystar eskerílgen, elímízdíń bolashaqtaǵy damu barysyn, azamat pen memlekettíń ózara qarym-qatynasynyń jańa modelín, memlekettík basqarudyń baǵyt-baǵdaryn aıqyndaıtyn jańa Konstıtutsıyamyzdy halyqtyń sheshímíne ūsynǵaly otyrmyz», – dedí ol.
Serík Egízbaevtyń sózínshe, qūjattyń negízínde adam jáne adamı qūndylyqtar, bılík tarmaqtarynyń teńgerímí, zań ústemdígí men áleumettík ádílettílík qaǵıdattary jatyr.
Mūnymen qosa, spıker «Auyl» partıyasynyń tarapynan respublıka óńírlerínde Konstıtutsıya jobasyn túsíndíru boıynsha keń auqymdy jūmystardyń júrgízílgenín jetkízdí.
«Qaraǵandy, Qyzylorda, Soltústík Qazaqstan, Qostanaı, Kókshetau, Shymkent jáne ózge de óńírlerde halyqpen kezdesuler ūıymdastyrylyp, eldíń píkírí tolyq eskeríldí», – dedí «Auyl» partıyasynyń tóraǵasy.
Onyń aıtuynsha, auyl tūrǵyndary ūsynylyp otyrǵan ózgerísterdí qūr zańnamalyq túzetuler retínde emes, ózderíníń tūrmys-tírshílígíne naqty yqpal etetín ómírlík mańyzy bar qadamdar dep qabyldauda. Kezdesuler barysynda azamattar būl bastamanyń taǵdyryn halyqtyń ózí aıqyndauy qajet degen ortaq ūstanym bíldíríp, qūjatty jalpyhalyqtyq sheshím arqyly bekítudíń mańyzy erekshe ekenín atap ótken.
«Osy oraıda mańyzdy bír jaıtty aıtqym keledí: kezdesulerde barlyq azamattar bír auyzdan: «Būl qūjatty halyqtyń sheshímímen bekítetín uaqyt jettí» degen píkírdí jıí aıtty. Sondyqtan, Konstıtutsıya jobasyn jalpyūlttyq referendumǵa shyǵarudy ūsynamyn. Barlyq otandastyrymyzdy jańa Konstıtutsıyamyzdy qoldauǵa shaqyramyn!», – dep qorytyndylady sózín Serík Egízbaev.