Muhtar Áýezov atyndaǵy Qazaq ulttyq drama teatrynyń 100 jyldyǵyna oraı Almaty qalasynda «Eńlik - Kebek» spektakliniń mereıtoılyq kórsetilimi ótti, - dep habarlaıdy Aqshamnews.kz.
«Eńlik - Kebek» qoıylymy qazaq kásibı teatrynyń tarıhynda aıryqsha oryn alady. Óıtkeni spektákl – 1926 jyly Muhtar Áýezov atyndaǵy Qazaq ulttyq drama teatrynda sahnalanǵan eń alǵashqy qoıylymdardyń biri. Qoıylym mahabbat pen adaldyq taqyrybyn kóterip, kópshilik kórermenge izgi qundylyqtardy nasıhat etedi.
Sonymen qatar, kórermen teatr mýzeıi uıymdastyrǵan «Ulttyq teatrdyń bastaýy - «Eńlik - Kebek» qoıylymy» atty ekspozısıamen tanysty. Kórmede alǵashqy sahnalyq qoıylymdar tarıhynan syr shertetin fotosýretter, qundy jádigerler men teatrdyń kórkemdik murasyn aıqyndaıtyn materıaldar usynyldy.