Atyraudaǵy Qarabalınder otbasynyń qazasyna baılanysty qozǵalǵan qylmystyq ís jańa málímettermen tolyqty. Tergeu barysynda kúdíktíler Sūltan Sársemálıev pen Aqbayan Mūqanǵalıevanyń shetelge naqty qashan ketkení jáne olardyń qalaı qolǵa túskení anyqtalǵan, – dep habarlaıdy aqshamnews.kz tílshísí.
Indonezıya polıtsıyasy ókílí Rıkkı Purnamanyń aıtuynsha, ízdeude júrgen ekí kúdíktí Lombok aralyndaǵy qonaqúılerdíń bírínde jasyrynǵan. Qūqyq qorǵau organdary kelgen sátte Sūltan Sársemálıev qashuǵa áreket jasaǵanymen, kóp ūzamaı ūstalǵan.
Olardy ūstau operatsıyasyna Interpoldyń ūlttyq byurosy, Soltústík Lombok polıtsıyasy jáne kóshí-qon qyzmetíníń ókílderí qatysqan.
Tergeu málímetínshe, kúdíktíler 2025 jylǵy 14 jeltoqsanda Kuala-Lumpurdan Balı aralyna ūshyp baryp, keıín Lombokqa ótken. Sol jerde ūstalǵanǵa deıín boı tasalap júrgen.
Būl ís 2025 jylǵy 25 jeltoqsanda tírkelgen. Sol kúní Atyrau oblystyq polıtsıyasyna bír otbasynyń joǵalǵany turaly aryz túsken. Tuystary olardyń qarasha aıynan berí habarsyz ketkenín aıtqan.
Ízdestíru sharalary barysynda 6 qańtarda zeınetker erlí-zaıyptynyń máıítí tabylyp, 8 qańtarda jer qoınyna tapsyrylǵan. Keıín qylmystyq ís adam óltíru baby boıynsha qaıta saralanyp, otbasynyń ózge múshelerín ízdeu jalǵasqan. Alaıda arada kóp uaqyt ótpeı olardyń da máıítterí tabylǵan.
Qaıǵyly oqıǵa saldarynan 66 jastaǵy Maqsot Qarabalın, 64 jastaǵy Násíp Óteshqalıeva, 35 jastaǵy Mıramgúl Qarabalına jáne 32 jastaǵy Nauryz Mūqanǵalıev kóz jūmǵan.