Almatyda kópbalaly otbasy tūratyn úıden órt shyqty. Der kezínde íske qosylǵan órt dabyly arqasynda tūrǵyndar oyanyp, úıden shyǵyp úlgergen. Sonyń nátıjesínde qūtqarushylar uaqyt ozdyrmaı shaqyrylyp, órttíń ūlǵayuyna jol berílmedí, – dep habarlaıdy aqshamnews.kz tílshísí.
Oqıǵa búgín tańerteń Novgorodskaya kóshesínde bolǵan.
Tótenshe jaǵdaılar qyzmetíníń málímetínshe, órt shyqqan sátte qūtqarushylar bes mınut íshínde oqıǵa ornyna jetken. Sol kezde úıdíń shatyr bólígí janyp jatqan. Mamandardyń aıtuynsha, baspana tez janatyn materıaldardan tūrǵyzylǵandyqtan, jalynnyń jyldam taralu qaupí joǵary bolǵan.
Vedomstvonyń habarlauynsha, 2025 jyldyń qazan aıynda ornatylǵan órt datchıgí uaqytynda dabyl bergen. Sonyń arqasynda úı tūrǵyndary oyanyp, syrtqa shyǵyp úlgergen árí bírden órt sóndírushílerdí shaqyrǵan.
Órt qysqa uaqyt íshínde oqshaulanyp, tolyq baqylauǵa alynǵan. Abyroı bolǵanda, oqıǵa saldarynan zardap shekkender joq.