Elímízde «Qazaqstan Respublıkasynyń keıbír zańnamalyq aktíleríne mádenıet, bílím beru, otbasy jáne memlekettík baqylau máselelerí boıynsha ózgeríster men tolyqtyrular engízu turaly» Zań negízínde jetím balalar men ata-anasynyń qamqorlyǵynsyz qalǵan balalardyń qūqyqtaryn qorǵau tetíkterín kúsheıtuge baǵyttalǵan mańyzdy ózgeríster qabyldandy, - dep habarlaıdy Aqshamnews.kz.
Būǵan deıín 2024 jyly balalardyń qūqyqtaryn qorǵau salasynda alty mańyzdy zań qabyldanyp, balalarǵa qatysty kez kelgen zorlyq-zombylyq úshín jauapkershílíktí kúsheıtuge, balalar saudasynyń aldyn aluǵa baǵyttalǵan qūqyqtyq tetíkterdí zańnamalyq deńgeıde bekíttí. Jańa zańnnyń qabyldanuy balalardy qūqyqtyq qorǵaudy qamtamasyz etu sharalarynyń júıelí jalǵasy boldy.
Endí jetím jáne ata-anysynyń qarauynsyz qalǵan balalardy asyrap alu nemese qamqorshylyqqa beru kezínde olardyń tuǵan-tuystaryna basymdyq beríledí. Eger jaqyn tuystary tabylmasa, bala zańdy nekede tūrǵan otbasyna ornalastyrylady. Sonymen bírge bala asyraushy otbasynda bolǵan kezeńde onyń zańdy ókílíníń sotqa tartyluy nemese psıhonevrologıyalyq nemese narkologıyalyq dıspanserde esepke alynuy qamqorshylyq míndetínen dereu shettetuge negíz bolady. Būl norma balanyń ómírí men densaulyǵyna qauíp tóndíruí múmkín jaǵdaılardyń aldyn aluǵa baǵyttalǵan.
Sonymen qatar ústínen qylmystyq qudalau júrgízílíp jatqan azamattarǵa bala asyrap aluǵa, qamqorshylyq jasauǵa nemese patronattyq tárbıege qatysuǵa tyıym salynady.
Būdan bólek, qamqorshylar, qorǵanshylar, patronat tárbıeshíler jáne asyrap alushylar endí jyl saıyn densaulyǵy, tabys kózí, tūrmystyq jaǵdaıy jáne sottylyǵynyń joq ekení turaly málímetterdí tapsyryp, ózderíníń senímdílígín rastauy tıís.
Jańa normalar jetím jáne ata-anasynyń qamqorlyǵynsyz qalǵan balalardy qorǵau júıesín kúsheıtíp, olardy otbasynda tárbıeleu jaǵdaılaryn tūraqty baqylaudyń tıímdílígín arttyruǵa, yqtımal qauípterdíń aldyn aluǵa múmkíndík beredí.