Astanada úsh jumysshynyń besqabatty ǵımarattyń bıiktiginen qulap jaraqat alýyna baılanysty polısıa departamenti qylmystyq is qozǵady, dep habarlaıdy Aqshamnews tilshisi.
Vedomstvo málimetinshe, oqıǵa qurylys jumystary júrgizilip jatqan nysanda bolǵan. «Qurylys jumystaryn júrgizý kezinde qaýipsizdik erejelerin buzý» baby boıynsha qylmystyq is tirkelgen.
Polısıa qyzmetkerleri úsh adamnyń qurylys kabınasynan qulaýynan jaraqattanǵanyn naqtylady. Qazir oqıǵanyń barlyq mán-jaıy anyqtalyp jatyr.
Eske salaıyq, buǵan deıin zardap shekkenderdiń biriniń uly Raqym Ádilgereı oqıǵa 18 qarashada saǵat shamamen 11:00-de bolǵanyn aıtqan. Onyń sózinshe, jumysshylar shamamen 15 metr bıiktikten — Kúltegin kóshesi, 16 mekenjaıyndaǵy salynyp jatqan Attila turǵyn úı kesheniniń besinshi qabatynan qulaǵan.
Ulttyq shuǵyl medısınany úılestirý ortalyǵynyń málimetinshe, sol kúni úsh er adam aýyr jaraqattarmen medısınalyq mekemege jetkizilgen.