2026 jylǵy 29 shílde men 9 tamyz aralyǵynda Astana qalasynda halyqaralyq multısporttyq "Bolashaq oıyndary" ótedí. Qazaqstan úshínshí ret ūıymdastyrylatyn būl bedeldí turnırdí qabyldaıtyn el retínde tańdalyp, daıyndyq jūmystary qazírdíń ózínde júıelí túrde bastalyp kettí, – dep habarlaıdy aqshamnews.kz tílshísí.
Kazan qalasynda 2024 jylǵy 21 aqpanda ótken "Bolashaq oıyndarynyń" ashylu saltanatynda Memleket basshysy kelesí oıyndardy Qazaqstan Respublıkasynda ótkízu turaly bastama kóterdí. Būl ūsynys halyqaralyq sport qauymdastyǵy tarapynan qoldau tauyp, elímízdíń turnırdí qabyldauǵa nıettí ekenín aıqyndady.
Osydan keıín, 2024 jylǵy 3 sáuírde Qazaqstan Respublıkasynyń Úkímetí Memleket basshysyna atalǵan Oıyndardy ótkízuge kelísím beru turaly resmı sūrau salynǵan hat joldady.
Al 2024 jylǵy 3 qazanda konkurstyq íríkteu qorytyndysy boıynsha Qazaqstan úshínshí halyqaralyq "Bolashaq oıyndaryn" ótkízetín el bolyp tańdaldy. Būl sheshím Dubaı qalasynda ótken saltanatty rásím barysynda resmı túrde jarıyalandy.
Turnırdí joǵary deńgeıde ūıymdastyru maqsatynda 2026 jyly Astana qalasynda ótetín halyqaralyq multısporttyq «Bolashaq oıyndaryn» daıyndau jáne ótkízu jóníndegí arnaıy ūıymdastyru komıtetí qūryldy. Ūıymdastyru komıtetíníń tóraǵasy bolyp Balaeva A.G. taǵaıyndaldy. Komıtet qūramyna múddelí memlekettík organdardyń bírínshí basshylary engízílgen.
Sondaı-aq, ūıymdastyru komıtetíníń tapsyrmasyna sáıkes, 2026 jyly Astanada ótetín turnırdí daıyndau jáne ótkízu úshín «Qazsportınvest» aktsıonerlík qoǵamynyń bazasynda arnaıy dırektsıya qūryldy.
2025 jylǵy 20 mamyrda turnırdí daıyndaudyń 15 negízgí baǵyty boıynsha 102 ís-sharany qamtıtyn ūıymdastyru komıtetíníń jūmys jospary bekítílíp, oǵan qol qoıyldy. Būl qūjat jarysty ūıymdastyrudaǵy negízgí qadamdardy naqtylaıdy.
Qazírgí josparǵa sáıkes, basty "Bolashaq oıyndary – 2026" turnırí 2026 jylǵy 29 shílde men 9 tamyz aralyǵynda Astana qalasynda ótedí. Jarystarǵa álemníń 100-den astam elínen qatysushylar keledí dep kútílude. Turnırdíń jalpy ūzaqtyǵy 12 kúnge sozylady.
Jarys baǵdarlamasyna tsıfrlyq jáne fızıkalyq kezeńderdí bíríktíretín 8 fıdjıtal pání engízílgen. Al turnırdíń jalpy júlde qory 5 mıllıon AQSh dollaryn qūraıdy.
Astana tórínde ótetín būl doda Qazaqstannyń halyqaralyq sport arenasyndaǵy bedelín arttyryp qana qoımaı, jańa formattaǵy jarystardy ūıymdastyrudaǵy áleuetín de kórsetuge múmkíndík beredí.