AQSh-tyń Luısvıll qalasynda UPS-tyń júk ūshaǵy áuejaıdan kóterílgen soń qūlap, borttaǵy úsh ekıpaj múshesí men jerdegí tórt adam qaza tapty. On bír adam auyr jaralanǵan, - dep habarlaıdy Aqshamnews.kz tílshísí.
AQSh-tyń Kentukkı shtaty, Luısvıll qalasyndaǵy Mūhammed Álı atyndaǵy halyqaralyq áuejaıdan ūshyp shyqqan UPS Airlines kompanıyasyna tıesílí McDonnell Douglas MD-11F ūshaǵy apatqa ūshyrady. Áue kemesí 5X2976 (UPS2976) reısímen Gonolulu baǵytyna bet alǵan.
Alǵashqy málímetke saı, borttaǵy úsh ekıpaj múshesíníń barlyǵy qaza tapqan, jerde bolǵan taǵy tórt adamnyń qazasy rastaldy; kemínde 11 adam auyr jaraqat alǵan. Oqıǵa 2025 jylǵy 4 qarashada keshkí uaqytta tírkeldí.
Jergílíktí bılík apat bolǵan aımaqtyń mańynda uly tútín men janarmaı tógílu qaupíne baılanysty áuejaıdan shamamen 8 shaqyrym radıusta shelter-in-place (ornynda qalu) rejımín engízdí. Kuágerler quatty jarylys pen ondaǵan metrge kóterílgen qalyń qara tútíndí baıqaǵanyn aıtady. Áuejaı jūmysy uaqytsha toqtatyldy.
UPS kompanıyasy oqıǵany rastady jáne tergeudí AQSh-tyń Kólík qauípsízdígí boıynsha ūlttyq keńesí (NTSB) jetekshílík etetínín habarlady. Federaldyq avıatsıya ákímshílígíníń (FAA) ókílderí apat ornyna kelíp, tekserís júrgízíp jatyr. Alǵashqy derekter boıynsha, ūshaq ūshyp kóterílu kezínde tehnıkalyq aqau boluy múmkín degen nūsqa qarastyrylyp jatyr. Tolyq qorytyndy NTSB tergeuínen keıín jarıyalanady.
