Konstıtutsıyalyq reforma jóníndegí komıssıyanyń 12-otyrysynda Qazaqstan Respublıkasy Parlamentí Májílísíníń deputaty, «Aq jol» partıyasy fraktsıyasynyń jetekshísí Azat Peruashev jańa Konstıtutsıya jobasyn qoldaıtynyn málímdep, ony jalpyhalyqtyq referendumǵa shyǵarudy ūsyndy.
Deputat jańa Ata zańnyń jobasy boıynsha shamamen jarty jylǵa sozylǵan jūmys barysynda fraktsıya parlamenttík reformaǵa jáne qūjattyń ózge de bólímderíne qatysty 50-den astam túzetu joldaǵanyn aıtty.
Peruashev kásípkerlík qūqyǵyn qorǵau, menshík nysandarynyń aluan túrlílígí men kepíldíkterín saqtau, sondaı-aq bank jáne kommertsıyalyq qūpıyany qorǵau turaly erejeler jańa Konstıtutsıyadaǵy ózge de jańashyl normalarmen bírge kásípkerlerdíń zańdy qūqyqtaryn qorǵauǵa, ınvestıtsıyalyq ahualdy jaqsartuǵa jáne jeke bıznestíń damuyna oń áser etetíníne toqtaldy.
«Elímízge jaı ǵana ınvestıtsıya emes, eń ozyq tehnologıyalardy ákeluge múmkíndík beretín «jedel damıtyn qalalarǵa» erekshe mártebe beru múmkíndígín asa mańyzdy dep sanaımyz. Óıtkení jańa ónímder, tauarlar men qyzmet túrlerí paıda bolǵanda, olardy retteu tetíkterí árdaıym úlgere bermeıdí», – dep atap óttí ol.
Fraktsıya jetekshísí partıyanyń bír palataly Parlamentke kóshu qajettígí jóníndegí ūstanymyn taǵy da rastady. Onyń aıtuynsha, partıya būl modeldí dáıektí túrde jaqtap keledí jáne Konstıtutsıya jobasy «Aq joldyń» ūlttyq bıznes pen otandyq kásípkerlerdíń múddesín qorǵau baǵytyndaǵy kózqarastary men qaǵıdattaryna sáıkes keledí.
«Qūjat joǵary ūıymdastyrushylyq árí mazmūndyq deńgeıde ázírlendí dep esepteımíz. Áríptesterímízdíń jańa Konstıtutsıya jobasyn jalpyhalyqtyq referendumǵa shyǵaru jóníndegí ūsynysyn qoldaımyz», – dedí Azat Peruashev.
