Medıtsınada búgíngí tańda densaulyq saqtau ísínde írgelí teorıyamen qatar pánaralyq ádíster batyl enude. Sanjar Asfendıyarov atyndaǵy QazŪMU-dyń S. Qarynbaev atyndaǵy qalypty anatomıya kafedrasynda būl protsess úzdíksíz ǵylymı-bílím beru tsıklíne aınalǵan. Medıtsına ǵylymdarynyń doktory, professor Ásıya Tóleubaıqyzy Dúısembaeva 70 jyldyq mereıtoıyna arnalǵan ǵylymı semınarda akademıyalyq nátıjelerín tanystyrdy. Ǵalymnyń kópjyldyq zertteulerí Qazaqstandaǵy ekologıyalyq morfologıyanyń írgetasyn qalady. Elímízdegí kásíbı bílíktí medıtsına kadrlaryn dayarlaudaǵy jańa beleske aınaldy.
Ásıya Tóleubaıqyzy Dúısembaevanyń ómír joly otandyq medıtsına tarıhymen tyǵyz baılanysty. Ol 1979 jyly Almaty memlekettík medıtsına ınstıtutynyń pedıatrıya fakultetín bítírgen soń, balalar dárígeríníń klınıkalyq oılau júıesín írgelí akademıyalyq ǵylymmen ūshtastyrudyń eń kúrdelí jolyn tańdady. 1981 jyldan bastap onyń kásíbı shańyraǵyna aınalǵan QazŪMU-dyń qalypty anatomıya kafedrasynda 45 jyldan astam ǵylymı-pedagogıkalyq qyzmet ettí. Eńbek joly assıstentten bastaldy. Búgínde elge tanymal professor ūstazdyq qyzmetín jalǵastyryp otyr.
Professor Á. Dúısembaevanyń ǵylymı-ınnovatsıyalyq qyzmetíníń basty jetístígí retínde anatomıya men ekologıya toǵysyndaǵy qoldanbaly baǵytty erekshe atauǵa bolady. Onyń ekotoksıkanttardyń áserínen lımfoıdtyq múshelerdegí morfofunktsıonaldyq ózgeríster men olardy túzetuge arnalǵan írgelí doktorlyq dıssertatsıyasy zamanauı syn-qaterlerdíń aldyn aluda dáleldengen nátıjelí eńbek sanalady. Reseı MǴA akademıgí Yu.I. Borodın, QR ǴA akademıgí A.A. Ydyrysov pen professor B.N. Nūrmūhambetova sıyaqty írí ǵalymdarmen bírlesken eksperımentter nátıjesínde Ásıya Tóleubaıqyzy qolaısyz qorshaǵan ortada aǵzanyń qorǵanys júıelerín anyqtauda mańyzdy tūjyrymdardy qalyptastyra aldy.
Professordyń ınnovatsıyalyq belsendílígí onyń akademıyalyq bedelímen aıshyqtalady. Onyń qorjynynda 200-den astam ǵylymı eńbek pen bedeldí halyqaralyq Scopus jáne Web of Science bazalaryndaǵy jarıyalanymdar bar. Germanıya, Izraıl, Mysyr, Italıya, Majarstan, Ispanıya jáne Portugalıya sıyaqty álemníń írí ǵylymı alańdarynda jasaǵan bayandamalary árdaıym úlken qyzyǵushylyq tudyryp, qazaqstandyq morfologıya mektebíníń álemdík keńístígíne jol ashty.
Búgíngí tańda qalypty anatomıya kafedrasy zamanauı ǵylym-bílím beru klasterí. Professor Á. Dúısembaeva oqu protsesín tıímdí ūıymdastyra bílgen basshy. On úsh ınnovatsıyalyq oqytu ádísín ázírlep qoımastan, olardy óndíríske engízdí.
Professor ǵylymı jıynda: «Eń qūndy aktıv - adam», - degen ūstanymdy berík ūstanatynyn atap óttí. Ǵalym-ūstaz unıversıtettíń Bílím beru baǵdarlamalary komıtetíníń tóraıymy jáne Ortalyq ádístemelík keńesíníń múshesí retínde bílíktí medıtsına mamandaryn dayarlaudaǵy jauapkershílík pen ízdenísín esh toqtatpaǵan jan.
Professor Ásıya Dúısembaevanyń mektebínen ótken QazŪMU studentterí ozat ınteraktıvtí jáne grafıkalyq qūrylymdarmen jūmys ísteıdí. Būl olarǵa halyqaralyq olımpıadalar men baıqaularda sapaly zertteu jobalarymen qatysuǵa múmkíndík beredí.
Ásıya Tóleubaıqyzynyń síńírgen eńbegí QazŪMU-dyń «Altyn medalímen», «Úzdík túlek», Úkímettíń «Eńbek ardagerí» medaldarymen jáne bedeldí «Qazaqstannyń Altyn kítabyna» enuímen joǵary laıyqty baǵalanǵan.
Professor Ásıya Dúısembaevanyń mereıtoıy otandyq medıtsına ǵylymy úshín úlken mereke. Osyndaı ǵalymdardyń arqasynda qazaqstandyq anatomıya mektebí dástúrler sabaqtastyǵyn jalǵap keledí.
Professor Gúlmıra Sūltanbaeva