12–13 aqpan aralyǵynda Almatyda aua temperaturasy shamamen –6 °S deńgeıínde bolyp, mūz aralas jańbyr jaudy. Jauyn-shashynnyń ayazdy aua raıymen qabattasuy joldar men trotuarlarda kóktaıǵaqtyń paıda boluyna áser ettí. Būl turaly qalalyq Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
Qozǵalys qauípsízdígín qamtamasyz etu maqsatynda kommunaldyq qyzmetter kóshe-jol jelísín jedel óńdeudí ūıymdastyrdy. Túngí uaqytta 203 aralas jol tehnıkasy jūmyldyryldy. Onyń íshínde qūm sepkíshter, jol sypyru-jınau mashınalary jáne kóktaıǵaqqa qarsy qospa sebetín arnaıy tehnıkalar bar.
Trotuarlardy, qoǵamdyq kólík ayaldamalaryn, júrgínshíler ótkelderín jáne qoǵamdyq keńístíkterdí óńdeu úshín qosymsha 95 bírlík shaǵyn tehnıka tartyldy. Negízgí magıstraldardy jedel tazalau jáne óńdeu maqsatynda arnaıy tehnıkanyń 25 kolonnasy qūryldy.
Bír mezgílde 75 jedel brıgada men 2971 jol jūmysshysy qyzmet atqardy. Júrís bólígí, trotuarlar, ayaldama keshenderí, jer ústí jáne jerasty ótkelderí, baspaldaqtar men pandustarǵa arnaıy qospa sebíldí. Ásírese negízgí magıstraldarǵa, jolaıryqtarǵa jáne medıtsınalyq, bílím beru ūıymdaryn qosa alǵanda áleumettík mańyzy bar nysandardyń kíreberísíne erekshe nazar audaryldy.
Jauyn-shashyn bastalǵanǵa deıín kóshe-jol jelísíne aldyn ala profılaktıkalyq óńdeu júrgízílíp, būl mūz qabatynyń túzílu qaupín azaıtuǵa múmkíndík berdí. Mūz aralas jańbyr jauǵan kezeńde jūmys úzdíksíz atqaryldy. Jauyn-shashyn toqtaǵannan keıín kóshelerdí mehanıkalandyrylǵan tazalau ūıymdastyryldy.
Der kezínde qabyldanǵan sharalardyń nátıjesínde qalanyń negízgí magıstraldarynda tūtas mūz qabyǵynyń qatuyna jol berílgen joq.
Qazírgí uaqytta kommunaldyq qyzmetter kúsheıtílgen rejımde jūmysyn jalǵastyryp jatyr. Kóshe-jol jelísíníń jaı-kúıíne táulík boıy baqylau júrgízílíp, qajet bolǵan jaǵdaıda uchaskeler qosymsha óńdeledí.
