Almatyda sońǵy jyldary megapolıs ekonomıkasynyń ósý núktesine aınalǵan qalanyń negizgi ınvestısıalyq klasteri - ındýstrıaldy aımaqtyń belsendi damýy jalǵasýda.
Bul týraly Almaty qalasynyń kásipkerlik jáne ınvestısıalar basqarmasy óńirlik komýnıkasıalar qyzmetimen birlesip uıymdastyrǵan baspasóz týry barysynda Almaty qalasynyń ındýstrıaldy aımaǵynyń (AIA) ınvestorlardy súıemeldeý departamentiniń bas mamany Ian Prokýdın málimdedi.
«Indýstrıaldy aımaqtyń jalpy aýdany 490 gektardy quraıdy. Onyń 326 gektary jobalarǵa bólingen. Jalpy 382,1 gektar jer bólindi, onyń ishinde 85 gektar keńeıtýdiń ekinshi kezeńinde», - dep atap ótti Ian Prokýdın.
2016-2024 jyldar aralyǵynda 142,1 mlrd teńge somasyna 41 joba iske asyryldy. Osy kezeńde óndirilgen ónimniń jalpy kólemi 2 524,4 mlrd teńgeni qurady. Aımaqqa qatysýshy kompanıalar 63,1 mlrd teńge somasyna salyq tóledi. Búginde ındýstrıaldy aımaqta 4430 jumys orny ashyldy.
Jumys istep turǵan kásiporyndardyń arasynda avtomattandyrylǵan jáne robottandyrylǵan tehnologıalar engizilgen iri óndiristik alańdar bar. Jańǵyrtý esebinen 2025 jyly jumys oryndarynyń sany men oqshaýlaý deńgeıi ulǵaıdy, al jekelegen baǵyttar boıynsha óndiristik qýattar eki esege artty. Osyndaı kásiporyndardyń biriniń jalpy shtaty 1600 adamǵa jetti.
2024 jyly ındýstrıaldy aımaqta 13,4 mlrd teńgeniń 11 jańa jobasy iske qosyldy. Nátıjesinde 977 jumys orny quryldy, onyń ishinde alty iri óndiris orny, sondaı-aq bes shaǵyn ónerkásiptik park bar.
«Indýstrıaldy aımaq joǵary tehnologıalyq óndirister úshin tartylys ortalyǵyna aınalýda. Bul Almatynyń bolashaq ındýstrıalyq damýy men jańa jumys oryndaryn qurý úshin mańyzdy», - dep atap ótti Ian Prokýdın.
2025 jyly Almatynyń Indýstrıaldy aımaǵynda 11 jańa óndiris iske qosylady
2025 jyly Almaty qalasynyń ındýstrıaldy aımaǵynda (AIA) jalpy quny 135,5 mlrd teńgeni quraıtyn 11 jańa jobanyń iske qosylýy josparlanýda. Atalǵan jobalar aıasynda 2662 jańa jumys orny ashylady. Bul týraly Almaty qalasy kásipkerlik jáne ınvestısıalar basqarmasy men óńirlik komýnıkasıalar qyzmetiniń uıymdastyrýymen ótken pres-týr barysynda AIA-nyń ınvestorlardy súıemeldeý departamentiniń jetekshi mamany Ian Prokýdın habarlady.
«Bıyl biz alty iri óndiris ornynyń iske qosylýyn kútip otyrmyz. Jobalarǵa salynatyn ınvestısıa kólemi 133 mlrd teńge, al jumys oryndarynyń sany 2 myńnan asady», – dedi Ian Prokýdın.
Mańyzdy jobalardyń biri – qoldanystaǵy ónerkásip oryndarynyń janynan qurylyp jatqan avtomobıl komponentteri tehnoparki bolady. Búginde mýltımedıalyq júıeler, avtokreslolar, logıstıkalyq hab óndirisi jolǵa qoıyldy. Nátıjesinde, barlyǵy 400-den astam jumys orny qurylady.
Sonymen qatar, ındýstrıaldy aımaqtaǵy jumys istep turǵan avtomobıl shyǵaratyn zaýyttardyń biri aýqymdy jańǵyrtýdy aıaqtady: dánekerleý jáne boıaý robottary, avtomatty konveıerler, jańa konveıerler ornatyldy. Bul avtomattandyrý deńgeıin arttyrýǵa, oqshaýlaý úlesin arttyrýǵa jáne ınjenerlik kadrlardyń jańa deńgeıin qurýǵa múmkindik berdi. Ujym sany 1600 adamǵa jetti. Endi zaýyt dánekerleý jáne boıaý (CKD) kezeńderin qamtıtyn shaǵyn túıindi ádispen avtokólikterdiń 50%-dan astamyn shyǵara alady.
2025 jyly ındýstrıaldy aımaqta qosymsha bes shaǵyn ónerkásip parki (SHÓP) ashylady. Bul jobalarǵa 2,48 mlrd teńge ınvestısıa salynyp, 640 jumys orny qurylmaq.
Indýstrıaldy aımaqtyń damýy Almaty qalasyndaǵy shaǵyn jáne orta bıznesti qoldaý baǵdarlamalarymen qatar júrgizilýde. Búginde qalada 1594 adam eńbek etetin 16 shaǵyn ónerkásip parki jumys isteıdi. 2026 jylǵa deıin taǵy 24 park salý josparlanyp otyr.
«Biz tek óndiristik alańdar ǵana emes, ınvestorlar úshin qala ekonomıkasynyń múddesine jumys isteıtin tolyqqandy ınfraqurylym qalyptastyryp jatyrmyz», – dep atap ótti Ian Prokýdın.
Almaty ındýstrıaldy aımaǵynda mıkroshóp ósiretin vertıkaldy jylyjaı iske qosyldy
2024 jyldyń jeltoqsanynda Almaty qalasynyń ındýstrıaldy aımaǵynda (AIA) salat, rýkkola, bazılık jáne basqa da mıkroshóp túrlerin ósirýge arnalǵan ınovasıalyq keshen iske qosyldy. Jýrnalıser AIA aýmaǵynda Almaty qalasynyń kásipkerlik jáne ınvestısıalar basqarmasy men óńirlik komýnıkasıalar qyzmeti uıymdastyrǵan baspasóz týry barysynda kásiporynnyń qyzmetimen tanysý múmkindigine ıe boldy.
Kásiporynnyń óndiristik qýattylyǵy jylyna 300 000 ónimdi quraıdy. Investısıalar kólemi – 121 mln teńge, onyń ishinde 100 mln teńge – óz qarajaty, 21 mln teńge – «Almaty» mıkroqarjy uıymy» JSHS-nen («Almaty» ÁKK» AQ enshiles kompanıasy) 2% mólsherlememen alynǵan qaryz qarajaty.
Kompanıa dırektory Ýlána Savchenkonyń aıtýynsha, jylyjaı ashý ıdeıasy jańa jáne ekologıalyq taza ónimderge suranystyń artýyna baılanysty paıda boldy.
«Búginde kóptegen adamdar durys tamaqtanýdy qalaıdy. Gıdropondy júıeler bizge sapaly kók shóp ónimderin jyl boıy, GMO men hımıa paıdalanbaı ósirýge múmkindik beredi. Maýsymdyq ózgerister baǵaǵa áser etpeıdi, tipti maýsymnyń eń qyzǵan kezinde de baǵalar turaqty bolyp qalady», – dep málimdedi Ý. Savchenko.
Jobany iske asyrýǵa kásipkerler jeke ınvestısıa saldy. Bul qarajatqa metal sóreler jasaldy, shamdar, keptirgishter, kondısıonerler, sý súzgileri, konteınerler, sorǵylar, sondaı-aq ónimdi jetkizýdi uıymdastyrýǵa arnalǵan avtomobıl satyp alyndy.
Sonymen qatar, baspasóz týry barysynda jýrnalıser birneshe kásiporyndardyń, sonyń ishinde jeńil avtomobılder shyǵaratyn tolyq sıkldi zaýyttyń jáne avtomobıl oryndyqtaryn óndirýge mamandandyrylǵan zaýyttyń qyzmetimen tanysa aldy.
Esterińizge sala keteıik, Almaty qalasynyń ındýstrıaldy aımaǵy — ınvestısıalyq jobalardy ornalastyrý úshin qurylǵan iri óndiristik alań. Onyń aýmaǵynda 107 kompanıa jumys isteıdi, al ınvestısıalardyń jalpy kólemi 550 mlrd teńgeden asady. 2016-2024 jyldar aralyǵynda munda 41 joba iske asyrylyp, 4,4 myńnan astam jumys orny quryldy, al shyǵarylǵan ónim somasy 2,5 trln teńgeden asty.
Almatynyń Indýstrıaldy aımaǵynda avtoónerkásip salasy qarqyn alýda
Almaty qalasynyń kásipkerlik jáne ınvestısıalar basqarmasy men óńirlik komýnıkasıalar qyzmeti birlesip uıymdastyrǵan pres-týr barysynda jýrnalıserge ındýstrıaldy aımaqta jańǵyrtylǵan óndiristik qýattar men avtokomponentter shyǵaratyn tehnopark jumysy tanystyryldy.
Hyundai Trans Kazakhstan jeńil avtokólikterin óndiretin tolyq sıkldi zaýyt aýqymdy jańǵyrtý baǵdarlamasyn aıaqtady. Nátıjesinde dánekerleý, boıaý jáne jınaqtaý sehtaryna robottandyrylǵan ýchaskeler engizilip, bul eńbek ónimdiligin aıtarlyqtaı arttyrýǵa jáne óndiristiń oqshaýlaý deńgeıin tereńdetýge múmkindik berdi.
«Zaýytta 11 ónerkásiptik robot ornatylyp, óndiristik jeliler keńeıtildi, jumys oryndarynyń sany artty. 2025 jyly kásiporynnyń qyzmetkerler sany 1600 adamǵa jetedi», – dedi Hyundai Trans Kazakhstan dırektorynyń óndiris jónindegi orynbasary Erbol Kasymkanov.
Jalpy aýdany 100 myń sharshy metrdi quraıtyn avtokomponentter tehnoparki úsh negizgi nysandy biriktiredi: avtokólik oryndyqtaryn shyǵaratyn zaýyt, mýltımedıalyq júıeler zaýyty jáne logıstıkalyq hab.
Almatynyń Indýstrıaldy aımaǵyndaǵy avtoóndiris klasterin damytýǵa salynǵan ınvestısıa kólemi 64 mlrd teńgeden asty. Bul otandyq avtoónerkásiptiń turaqty ekojúıesin qalyptastyrýǵa, jańa jumys oryndaryn ashýǵa, shaǵyn jáne orta bıznesti damytýǵa, sondaı-aq bilikti ınjener mamandardy daıarlaýǵa zor serpin berýde.
Qazaqstan Respýblıkasynda avtoónerkásipti damytý ındýstrıalandyrýdyń basym baǵyttarynyń biri bolyp qala beredi. Osyndaı jobalardy júzege asyrý elimizdiń ónerkásiptik áleýetin nyǵaıtyp, tehnologıalyq ilgerileýge jol ashady.