Almaty qalasynyń kásípkerlerí eger ūjymdyq ımmunıtet bolmasa, onda bıznes únemí lokdaunnan jáne qatań shekteu sharalarynan zardap shegedí dep esepteıdí. Sondyqtan olar kásípkerlerge – ózderín jáne qyzmetkerlerín ekpe aluǵa úndeu joldady dep habarlaıdy almaty-akshamy.kz
Aıta keterlígí, Almaty ákímdígí qalanyń kásípkerler palatasymen jáne medıtsınalyq ūıymdarmen bírlesíp kóshpelí egudí ūıymdastyruǵa baǵyttalǵan ís-sharalardy júrgízude. Osylaısha, jappaı vaktsınatsıya bastalǵaly berí ūıymnyń eńbek ūjymdaryna 50-den astam kóshpelí kezdesu ūıymdastyryldy. Sondaı-aq, mobıldí toptar kásíporyndarǵa baryp, vaktsınalanudyń mańyzyn túsíndírude.
RG Brands kompanıyasynyń basshysy Qaırat Májíbaevtyń aıtuynsha, sayası, áleumettík jáne mádenı aıyrmashylyqtarǵa qaramastan, barlyq elder COVID-19-ben kúresude jáne vaktsınatsıya negízgí faktorlardyń bírí bolyp tabylady.
«Búkíl álem COVID-19-ǵa qarsy kúreske bíríktí, būl naryqtyq faktor, naryqtyń ózgeruí. Bíz, kásípkerler, COVID-19 bıznes úshín ūzaq merzímdí kerí tūraqty faktorǵa aınalmauy úshín vaktsınalanu qajet. Qazír kompanıya basshylyǵynyń basty míndetteríníń eńbek ūjymyn qorǵau. Sonymen qatar, menedjer retínde qyzmetkerlerdíń úzdíksíz jūmys jasauy,jaıly jaǵdaıdy qalyptastyru óte mańyzdy. Sondyqtan, ekpe saldyru eńbek ónímdílígín arttyryp qana qoımaıdy, denímízdíń sau árí aınalamyzdyń aman boluynyń basty faktoryna aınalady», - dedí Qaırat Májíbaev.
Almaty qalasy Kásípkerler palatasy Óńírlík keńesíníń tóraǵasy Maksım Baryshevtíń aıtuynsha, vaktsınatsıya alu asa qajet. Kásíporyndarda jappaı vaktsınatsıya bírínshí kezekte ūjymdyq ımmunıtettí alu úshín qajet, sebebí būl bızneske tíkeleı áser etedí.
«Eger adamdardyń bárí sau bolsa, onda olardyń barlyǵy jūmysqa tolyq kíríse alady. Eger bızneske shekteu qoıylmasa, el ekonomıkasy damyp, daǵdarysqa deıíngí deńgeıge jetedí. Meníńshe, vaktsınatsıya – būl oryn alǵan jaǵdaıdan shyǵudyń joly», - deıdí Maksım Baryshev.
Raimbek Group holdıngíníń negízín qalaushy jáne dırektorlar keńesíníń tóraǵasy, kásípker jáne qoǵam qaıratkerí Raıymbek Batalov vaktsınany ózí aldy, onyń otbasy da onyń úlgísín ūstandy.
«Bíz halyqtyń 70-75%-dan astamy vaktsınalanbaǵan kezde ūjymdyq ımmunıtet bolmaıtynyn jáne bíz bıznes retínde únemí lokdaun men shekteulerden zardap shegetínín túsínemíz. Ekpe saldyru ınfektsıyanyń taraluyn toqtatady, ózara baılanysqa jol ashady, qalypty ómírge qaıta oralumyzǵa múmkíndík beredí. Sondyqtan bárímíz bírígíp, sanalylyq tanytyp, vaktsınalansaq, qauíptí pandemıyany sózsíz jeńemíz», - dedí Raıymbek Batalov.
Búgínde Almatyda jalpy 1 aqpannan 18 tamyzǵa deıíngí aralyqta 828 376 adam I komponentpen, 655 235 adam II komponentpen egíldí. Ótken táulíkte 5 153 adam bírínshí komponentpen, al 6276 adam ekínshí komponentpen vaktsınalandy.
Eske salsaq, qalada medıtsınalyq ūıymdarda, mektepterde, mádenıet jáne sport nysandarynda, bazarlarda jáne qalanyń SOSO-da 160 ekpe punktí bar (250-ge deıín ūlǵaıtu múmkíndígímen). 1 028 adamnan tūratyn 237 ekpe brıgadasy jūmyldyryldy.