Búgin Qazaq ulttyq qyzdar pedagogıkalyq ýnıversıtetinde Almaty qalasy Bilim basqarmasynyń qoldaýymen «Sabaqty zertteý arqyly oqý men oqytýdy damytý» (Improving Teaching and Learning Through Lesson Study) atty II qalalyq ǵylymı-tájirıbelik konferensıa ótti. Sharaǵa 300-den astam jetekshi ǵalymdar, tájirıbeli pedagogter, bilim berý uıymdarynyń basshylary men bolashaq muǵalimder qatysty.
Konferensıa tájirıbe almasýǵa, úzdik praktıkalardy talqylaýǵa jáne ǵylymı zertteýlerdi mekteptegi kúndelikti tájirıbege engizýge arnalǵan alań boldy. Qatysýshylar óz nazaryn sabaqtyń tıimdiligin arttyrýǵa baǵyttalǵan «Lesson Study» ádistemesine aýdardy.
«Almaty qalasynyń orta bilim berý uıymdarynda ozyq tájirıbemen almasý, jetistikterdi saralaý jáne Lesson Study ádistemesin qoldaný perspektıvalaryn anyqtaý baǵytynda júıeli jumystar júrgizilýde. 2013 jyldan bastap qala muǵalimderiniń tájirıbesinde maqsatty zertteýler júzege asyrylyp keledi. Qazirgi ýaqytta 32 jetekshi mektep bekitilip, trenerler daıyndaldy. Olar Lesson Study ádisi arqyly oqytýdy jaqsartý máselelerin talqylaýǵa qatysyp, áriptesterimen tájirıbesin bólisýde», – dedi Almaty qalasy Bilim basqarmasyna qarasty Qalalyq bilim berýdegi jańa tehnologıalardyń ǵylymı-ádistemelik ortalyǵynyń (QBBJTǴÁO) dırektory Dáýren Saǵynǵalıev.
Onyń aıtýynsha, mektepti zertteýshiler qaýymdastyǵynyń qorjynynda 200-den astam zertteý jumystary jınaqtalǵan. Bul nátıje megapolıs pedagogteriniń erekshe qyzyǵýshylyǵyn týdyryp otyr. PedagogterdińLesson Study ádisin júrgizý tájirıbesimen bólisýi, ádistemelik resýrstar men ózekti aqparattarǵa qol jetkizýi úshin barlyq jaǵdaı jasalǵan.
«Bilim basqarmasy tarapynan qaladaǵy bilim sapasyn arttyrý maqsatynda júıeli jumys júrgizilip jatyr jáne onyń oń nátıjeleri de bar. Biz bul baǵyttaǵy jumystardy odan ári kúsheıtip, bilim berý sapasyn arttyrýdyjalǵastyramyz», – dep atap ótti Dáýren Saǵynǵalıev.
Konferensıa jumysy birneshe seksıalar men posterlik galereıa formatynda jalǵasty. Onda muǵalimder men stýdentterdiń zertteý nátıjeleri men praktıkalyq jumystary usynyldy. Aýqymdy shara barysynda «Muǵalim tájirıbesindegi úzdik sabaq zertteý úlgileri», «Inklúzıvti ortadaǵy oqytý prosesin jetildirýdegi sabaqty zertteý tájirıbesi» syndy baǵyttarǵa basymdyq berildi.
Ádistemelik ortalyq basshysy Dáýren Naýryzbaıuly atap ótkendeı, mundaı is-sharalar birlesken bilim berý jobalaryn iske asyrýda, bolashaq pedagog kadrlardy daıarlaý sapasyn arttyrý joldaryn izdestirýde oń ról atqarady. Bul baǵyttaǵy konferensıalar Almaty qalasynyń bilim berý ekojúıesin damytý men áriptestikti nyǵaıtýda jańa múmkindikterge jolashady.