Memleket basshysy tsıfrlandyrudyń eldíń básekege qabílettílígín arttyratyn negízgí faktor ekenín aıtty, – dep habarlaıdy aqshamnews.kz tílshísí.
"Auyl sharuashylyǵyn avtomattandyru ónímdílíktí arttyrady, su resurstaryn únemdeıdí, ekologıyaǵa túsetín júktemení azaıtady. Mal sharuashylyǵynda qūjat aınalymyn tolyq joyatyn jáne eseptíń ashyqtyǵyn arttyratyn tsıfrlyq júıeler engízílude. El boıynsha 650-den astam "aqyldy" ferma jūmys ístep tūr. Olar avtomattandyrylǵan sauu, azyqtandyru jáne mıkroklımatty baqylau júıelerímen jabdyqtalǵan", – dedí Prezıdent.
Onyń aıtuynsha, egín sharuashylyǵynda, sonyń íshínde tūqym sharuashylyǵynda ónímdí "egístíkten ústelge deıín" qadaǵalau júıesí engízílude.
"Tsıfrlyq josparlau men boljam jasau múmkíndíkteríníń arqasynda Qazaqstan qatarynan ekínshí jyl 27 mln tonna deńgeıínde rekordtyq astyq jınap otyr", – dedí Toqaev.
Sondaı-aq Prezıdent auyl sharuashylyǵy jerlerín tolyq tsıfrlandyru jūmystary júríp jatqanyn, agrodrondar, sputnıktík navıgatsıya jáne meteostantsıya derekterín qoldanu keńeıíp kele jatqanyn atap óttí. Būdan bólek, jerdí paıdalanuǵa beru protsesí de elektrondy formatqa kóshírílude.
"Agrarlarǵa memlekettík qoldau tolyq elektrondy formatqa kóshíríledí, būl sybaılas jemqorlyq táuekelderín azaıtady. Auyl sharuashylyǵyn tsıfrlandyru tájírıbesín keńeıtu mańyzdy. Bízdíń kúsh-jígerímíz Eurazıyalyq ekonomıkalyq odaqtyń jahandyq azyq-túlík naryǵyndaǵy pozıtsıyasyn nyǵaıta alatyn joǵary tehnologıyalyq bastamalardy qoldauǵa baǵyttaluy tıís", – dep atap óttí Qasym-Jomart Toqaev.
Memleket basshysy Eurazıyalyq ekonomıkalyq odaq turaly shartqa agroónerkásíptík keshen salasyndaǵy kooperatsıyalyq jobalardy qarjylyq qoldau bólímí boıynsha engízíletín ózgeríster būl baǵyttaǵy mańyzdy qadam ekenín aıtty.
"Mūndaı tehnologıyalyq bastamalardy auqymdy qarjylandyru úshín Eurazıyalyq damu bankíníń áleuetín tolyq paıdalanu qajet. Qūrylǵanyna jıyrma jyl bolǵan būl qarjy ınstıtuty ózín Eurazıyalyq ıntegratsıyanyń tıímdí árí sūranysqa ıe qūraly retínde kórsettí. Bíz jabyq qūramdaǵy otyrysta banktíń basqarma tóraǵasynyń mazmūndy bayandamasyn tyńdap, Eurazıyalyq damu bankí būdan árí de odaq keńístígíndegí strategıyalyq jobalardy íske asyrudyń negízgí qozǵaushy kúshí bolyp qaluy tıís degen ortaq píkírge keldík", – dep túıíndedí Qazaqstan Prezıdentí.