Ásírese jyljymaıtyn múlík pen kólík satyp alar kezde tólem jasamas būryn qūjatty tekseríp, satushynyń bergen uádesín resmı qūjatta bekítíp alyp, auyzsha kelísím jasamau kerek, – dep habarlaıdy aqshamnews.kz tílshísí.
Mámíle jasalǵanǵa deıín qandaı nársege nazar audaryp, satyp alǵannan keıín qalaı áreket etu kerek ekenín Óńírlík kommunıkatsıyalar qyzmetínde «Qazaqstan tūtynushylar ūlttyq lıgasy» RQB prezıdentíníń orynbasary Vasılıı Romanovskıı aıtyp berdí.
Jūrttyń kóbí jyljymaıtyn múlík pen kólíktí eń qymbat dúnıeníń qataryna jatqyzady. Sondyqtan qūjatty rásímdeu kezínde ketken az ǵana qatelíktíń ózí edáuír shyǵynǵa alyp keluí múmkín. Vasılıı Romanovskııdíń aıtuynsha, shartqa qol qoımaı tūryp osyndaı shyǵyndy eptep azaıtuǵa bolady eken.
Páter satyp alǵan kezde menshík qūqyǵyn rastaıtyn qūjatty, nysannyń alańy men josparyn, kepíldíń, tyıym saludyń, qamauǵa alu men satuǵa qoıylǵan basqa da shekteudíń bar-joǵyn tekseríp alu qajet. Sonymen qatar jyljymaıtyn múlíkke qatysty qandaı da bír bereshektíń bar-joǵyn da aldyn ala anyqtap alǵan jón. Páterdíń barlyq mańyzdy sıpattamasy - mekenjaıy, alańy, qūny, tūrǵyn úıdíń jaǵdaıy, ony beru merzímí, jıyntyqtaluy, sondaı-aq jyljymaıtyn múlíktí jańa menshík ıesíne bergenge deıín paıda bolǵan bereshektí óteu boıynsha satushynyń míndettemesí tíkeleı shartta kórsetíluí tıís.
«Adamǵa bír páter nemese bír jospar kórsetílíp, al shartta basqa sıpattama kórsetílgen jaǵdaılar bolǵan. Sondyqtan tek satushynyń sózíne nemese jarnamalyq materıaldarǵa súıenuge bolmaıdy, málímetterdí qūjattarmen salystyru qajet. Satushynyń barlyq mańyzdy uádelerí shartta jazbasha túrde kórsetíluí tıís. Eger olar qūjatta bolmasa, keıín óz qūqyǵyńyzdy dáleldeu sízge qıynǵa túsedí», – deıdí Vasılıı Romanovskıı.
Mamandar qūrylysy álí ayaqtalmaǵan úıden tūrǵyn jaı satyp alǵanda erekshe saq bolu kerektígín aıtty. Qūrylystyń keshíguí nemese toqtap qaluy, qūrylys salushynyń bankrotqa ūshyrauy, sondaı-aq páterdíń alańy, árleuí men basqa da málímdelgen sıpattamanyń ózgeruí sıyaqty qauíp bar mūnda da.
Qarajat salmas būryn satyp alushy qūrylys salushynyń ózín, nysanǵa qatysty qūjattar men mámíle talaptaryn tekseruí kerek. Būl rette menedjerlerdíń, mysaly, úıdí paıdalanuǵa beru merzímí, árleu jūmysy nemese jıyntyqtaluy jóníndegí uádesí de jazbasha túrde bekítíluí tıís.
Eger páterdí satyp alǵannan keıín másele anyqtalsa, mamandar eń aldymen ony rastaıtyn qūjattardy jınauǵa keńes beredí. Olarǵa auyrtpalyqtar turaly málímetter, bereshek turaly aqparat, eseptegísh kórsetkíshterí, tūrǵyn úıdíń qabyldap alǵan kezdegí jaǵdaıyn rastaıtyn qūjattar men basqa da dálelder jatady. Osydan keıín satushyǵa būzushylyqty joyu, bereshektí óteu, keltírílgen shyǵyndy óteu nemese shartty būzu sıyaqty naqty talap kórsetílgen jazbasha narazylyq joldanady:. «Tūtynushylardyń qūqyǵyn qorǵau turaly» zańnyń 42-4-babyna sáıkes, satushy talappen kelíspegen jaǵdaıda 10 kúntízbelík kún íshínde dáleldí jazbasha jauap beruí tıís.
Avtokólíktí salonnan satyp alar kezde de kóp jaıtqa nazar audaru qajet. Qabyldau-tapsyru aktísíne qol qoımas būryn satyp alushy VIN-nómírín, kólíktíń kuzovyn, júrísín, málímdelgen jıyntyqtaluyn, qūjattary men syrtqy zaqymdardyń bar-joǵyn salystyryp tekseruí kerek. Eger aqau tabylyp jatsa, olardy aktíde jazbasha túrde tírkeu qajet.
Satyp alǵannan keıín óndírístík aqau anyqtalǵan jaǵdaıda dılerge auyzsha júgínumen shekteluge bolmaıdy. Satushyǵa avtokólíktíń markasy, VIN-nómírí, júrís kórsetkíshí, aqaudyń anyqtalǵan kúní, onyń sıpattamasy men satyp alushynyń naqty talaby kórsetílgen jazbasha narazylyq jíberu qajet.
«Avtokólíktí servıske tek tapsyrys-naryad nemese akt boıynsha beru kerek. Onda kólík ıesí shaǵymdanyp otyrǵan naqty aqau kórsetíluí tıís. Shartty, servıstík kítapshany, dıagnostıka nátıjelerín, fotosuretter men satushymen bolǵan barlyq hat almasudy saqtau qajet. Keıín dau tuyndaǵan jaǵdaıda dál osy qūjattar aqaudyń qashan paıda bolǵanyn jáne dılerdíń satyp alushynyń ótíníshíne qalaı áreket etkenín dáleldeuge kómektesedí. Sondyqtan mūnda qūjatpen tírkeu óte mańyzǵa ıe», – dep atap óttí spıker.
Zań talapqa saı emes sapadaǵy avtokólík satyp alǵan jaǵdaıda aqaulardy tegín joyu, tauardyń baǵasyn tómendetu, jóndeuge ketken shyǵyndardy óteu, al zańda belgílengen jaǵdaılarda avtokólíktí auystyru nemese aqshany qaıteru sıyaqty satyp alushynyń qūqyǵyn qorǵaudyń bírneshe jolyn qarastyrady.
Avtokólík tehnıkalyq kúrdelí tauar sanatyna jatatyndyqtan, ony auystyru nemese aqshany qaıtaru múmkíndígí, atap aıtqanda, eleulí aqaudyń boluyna baılanysty. Mūndaı aqauǵa qaıtalanatyn būzylular, ūzaq uaqyt jóndeude tūru, avtokólíktí paıdalanu múmkíndígíníń bolmauy jáne basqa da jaǵdaılar jatady. Vasılıı Romanovskııdíń aıtuynsha, eleulí aqau bolǵan jaǵdaıda zań boıynsha aqshany qaıtaru úsh jūmys kúní íshínde, al avtokólíktí auystyru 30 jūmys kúní íshínde júrgízíluge tıís.
Qoldanylǵan avtokólíktí jeke tūlǵadan satyp alǵan jaǵdaıda bólek erejeler qoldanylady. Eger satushy qarapaıym azamat bolyp, avtokólíkterdí kásípkerlík maqsatta satumen aınalyspasa, «Tūtynushylardyń qūqyqtaryn qorǵau turaly» zańnyń normalary, ádette, mūndaı mámílege qoldanylmaıdy.
Sondyqtan satyp alushynyń negízgí qorǵanysy – kólíktí aqsha bermes būryn mūqıyat tekseru. VIN-nómírín, tírkeu tarıhyn, kepíldíń, qamauǵa alu men basqa da shekteudíń bar-joǵyn, jol apaty men júrís turaly málímettí tekseru, sondaı-aq satyp alushynyń ózí tańdaǵan servıstík ortalyqta táuelsíz dıagnostıka júrgízu qajet. Shartta naqty júrís kórsetkíshín, kólíktíń belgílí tehnıkalyq jaǵdaıyn, bar aqaularyn, qūnyn jáne úshínshí tūlǵalardyń qūqyqtarynyń joq ekenín kórsetken jón.
«Eger qoldanylǵan avtokólíktí satyp alǵannan keıín jasyryn aqau anyqtalsa, satyp alushy būl aqaudyń mámíle jasalǵanǵa deıín bolǵanyn jáne satushynyń ol turaly habarlamaǵanyn dáleldeuge májbúr bolady. Mūndaı daularda dıagnostıka nátıjelerí, saraptamalyq qorytyndylar, tapsyrys-naryadtar men satushymen júrgízílgen hat almasu dálel retínde paıdalanyluy múmkín. Sondyqtan avtokólíktí tólem jasamas būryn teksergen dūrys. Onyń ústíne tekserudí satyp alushynyń ózí tańdaǵan servıstík ortalyqta júrgízu qajet. Mámíle qanshalyqty egjeı-tegjeılí rásímdelse, keıín óz múddeńdí qorǵau múmkíndígí de soǵūrlym joǵary bolady», – dep túsíndírdí Vasılıı Romanovskıı.