2026 jyly 10–13 aqpan aralyǵynda Astana qalasyndaǵy EXPO halyqaralyq kórme ortalyǵynda FIRST Robotics – Central Asia FIRST Championship & Drone Racing 2026 halyqaralyq festıvalí óttí. Auqymdy dodaǵa jetí elden 3000-nan astam oqushy qatysty.
Joǵary nátıjege Almaty qalasy Nauryzbaı audanyndaǵy Oqushylardyń ınnovatsıyalyq shyǵarmashylyq ortalyǵynyń tárbıelenushílerí qol jetkízdí. FIRST LEGO League Explore sanatynda Alem Innovators komandasy turnırdíń eń joǵary marapaty — Champions Award Winner ataǵyn ıelendí.
Komanda qūramynda Aısha Kenjebaı, Nūrbergen Jáníbek, Dosan Dáulet jáne Omar Erlanūly bar. Jetekshísí — Aıdana Amanbekqyzy Ermek.
Būl jeńís almatylyq jas ónertapqyshtarǵa AQSh-tyń Hyuston qalasynda ótetín FIRST álemdík fınalynda Qazaqstan atynan qatysuǵa jol ashty.
Atalǵan jetístík – Almatyda oqushylardyń ınjenerlík jáne tehnıkalyq shyǵarmashylyǵyn damytu baǵytynda júrgízílíp jatqan júıelí árí maqsatty jūmystyń nátıjesí. Innovatsıyalyq ortalyqtar balalardy robototehnıkaǵa, baǵdarlamalauǵa jáne zamanauı tehnologıyalarǵa erte jastan tartuǵa múmkíndík beríp, básekege qabílettí jas ınjenerler buynyn qalyptastyruda.
Chempıonatqa sondaı-aq Kazbots jáne Alash komandalary da qatysyp jatyr. Ózge sanattar boıynsha qorytyndy aldaǵy kúnderí jarıyalanady.
STEM-bílím berudí damytu jáne daryndy oqushylardy qoldau Almaty qalasynyń bílím beru júıesíndegí basym baǵyttardyń bírí bolyp qala beredí.
