Almaty onkologıyalyq ortalyǵy dárígerí Anarbaı Qazynanyń aıtuynsha, sút bezíndegí túıín sút bezí qaterlí ísígíníń eń jıí kezdesetín alǵashqy belgíleríníń bírí ekenín aıtty, – dep habarlaıdy aqshamnews.kz tílshísí.
«Alaıda ísíktí árdaıym ózín-ózí tekseru kezínde anyqtau múmkín bola bermeıdí. Keı jaǵdaıda auru basqa, asa baıqala bermeıtín belgíler arqyly da bílínuí múmkín. Sondyqtan keude aımaǵyndaǵy kez kelgen ózgeríske mūqıyat qarau qajet», – deıdí onkolog.
Mamandardyń aıtuynsha, alańdatuy múmkín belgílerge mynalar jatady: sút bezínde nemese qoltyq astynda túıínníń paıda boluy; keude píshíníníń nemese kólemíníń ózgeruí; teríníń qyzaruy nemese qatayuy, «apelsın qabyǵy» tárízdí ózgerís, emízíktíń nemese teríníń íshke tartyluy, emízíkten ádetten tys sūıyqtyqtyń bólínuí. Keı jaǵdaıda keude tūsynda ūzaqqa sozylǵan jaısyzdyq nemese auyrsynu baıqaluy múmkín. Mūndaı ózgeríster baıqalǵan jaǵdaıda múmkíndígínshe erterek dárígerge qaralyp, tekseruden ótu qajet.
Mamannyń aıtuynsha, sút bezí qaterlí ísígí ūzaq uaqyt boıy eshqandaı belgílersíz ótuí múmkín. Sondyqtan aurudyń aldyn alu jáne tūraqty tekseruden ótíp tūru erekshe mańyzdy. Erte anyqtaudyń eń tıímdí tásílderíníń bírí – skrınıng.
Qazaqstanda sút bezí obyryn erte anyqtauǵa arnalǵan memlekettík skrınıng baǵdarlamasy jūmys ísteıdí. Onyń ayasynda 40 pen 76 jas aralyǵyndaǵy áıelder tírkelgen emhanalarynda ekí jylda bír ret tegín mammografıyadan óte alady.
Būl zertteu auru belgílerí álí baıqalmaǵan kezeńde sút bezíndegí ózgerísterdí anyqtauǵa múmkíndík beredí. Mūndaı jaǵdaıda emdeu áldeqaıda tıímdí bolady.
Dárígerdíń aıtuynsha, skrınıngten tūraqty ótíp tūru aurudy kesh anyqtau qaupín aıtarlyqtaı tómendetedí jáne áıelderdíń densaulyǵy men ómírín saqtauǵa kómektesedí. Sol sebeptí profılaktıkalyq tekserulerdí keıínge qaldyrmaı, densaulyqtaǵy kez kelgen ózgerís baıqalsa, der kezínde mamandarǵa júgínu mańyzdy.