Qazaqtyń baı muzykalyq mūrasyn álemge tanytyp júrgen «Sazgen sazy» folklorlyq-etnografıyalyq ansamblí Vena qalasynda jeke shyǵarmashylyq kontsertín sáttí ótkízdí, – dep habarlaıdy aqshamnews.kz tílshísí.
Almaty qalasy ákímdígíníń qoldauymen jáne Qazaqstan Respublıkasynyń Austrıyadaǵy elshílígí ūıymdastyruymen ótken kesh álemdegí eń bedeldí kontsert zaldarynyń bírí – Musikverein sahnasynda óttí.
Klassıkalyq muzykanyń altyn ordasy sanalatyn būl sahnada óner kórsetu – kez kelgen shyǵarmashylyq ūjym úshín úlken mártebe. Ansambl kontsertí europalyq kórermenníń zor qyzyǵushylyǵyn tudyryp, mańyzdy mádenı oqıǵaǵa aınaldy.
Keshte Qazaqstannyń halyq artısí Nūrjamal Úsenbaeva, Vena konservatorıyasynyń túlegí, Mahler Philharmoniker jetekshí solısí Aıgúl Shamshıdenova jáne ánshí Jeńíl Erjanov ansambldíń súıemeldeuímen óner kórsetíp, kórermenge erekshe áser syılady.
Kontsert Qarajorǵa kúıímen bastalyp, Nūrǵısa Tílendıevtíń «Álqıssa», «Ata tolǵauy» shyǵarmalarymen, sondaı-aq halyq ánderímen jalǵasty. Baǵdarlama ūlttyq tuyndylarmen ǵana shektelmeı, Batys klassıkasymen úılesím tapty. Volfgang Amadeı Motsart pen Iogann Shtraus shyǵarmalary qazaqtyń ūlttyq aspaptarynda oryndalyp, europalyq kórermendí tántí ettí.
Ansambldíń kórkemdík jetekshísí, QR eńbek síńírgen qaıratkerí Baǵdat Tílegenov kontserttíń joǵary deńgeıde ótkenín atap óttí. Onyń aıtuynsha, keshke 30-dan astam sheteldík elshí, halyqaralyq ūıymdardyń, sonyń íshínde BŪŪ jáne YuNESKO ókílderí, sondaı-aq Austrıyanyń zıyaly qauym ókílderí qatysty.
Kórermenníń sūrauy boıynsha ónerpazdar kesh sońynda bírneshe shyǵarmany qaıta oryndap, qoshemetke bólendí.
«Sazgen sazy» ansamblí būǵan deıín de Qytaı, AQSh, Túrkıya, Frantsıya, Germanıya jáne basqa da elderde óner kórsetíp, qazaq mádenıetín laıyqty deńgeıde tanytyp keledí.
Ūlttyq muzykalyq mūrany álemdík sahnada nasıhattap júrgen ūjymnyń Musikverein zalyndaǵy kontsertí – qazaq óneríníń halyqaralyq bedelín arttyrǵan mańyzdy mádenı oqıǵa.