Óńírlík kommunıkatsıyalar qyzmetínde qazaqstandyq ǵalym, sayasattanu ǵylymdarynyń doktory, QazŪU professory Shárípbek Ámírbekov sóz sóıledí. Ol búgíngí tańda ǵylymnyń memleket pen táuelsízdíkke qalaı áser etetínín túsíndírdí, – dep habarlaıdy aqshamnews.kz tílshísí.
Qazaqstanyq ǵalymnyń aıtuynsha, álem qazír túbegeılí ózgergen. Būryn eldíń qanshalyqty quatty ekenín áskerí men ekonomıkasyna qarap bíletín bolsaq, qazír onyń ornyn ıntellekt pen bílím basypty.
Memleket óz tehnologıyasyn jasaı aluǵa shamasy jetse – egemendík degenímíz de sol ózí. Eger el syrttan kelgen baǵdarlamalarǵa, jasandy ıntellekt pen qūral-jabdyqqa qarap otyratyn bolsa, ondaı eldíń bolashaǵy kúmándí eken.
Sondyqtan tsıfrlyq tehnologıya, medıtsına men energetıka salasynda ūlttyq ǵylymdy damytu kerek. Būl eldí syrtqy yqpaldan qorǵauǵa sep bolady.
Ǵylym túrlí qauíp-qaterlerge qarsy tūruda da mańyzdy ról atqarady:
• qorǵanys salasynda — zamandyq tehnologıyalar men jasandy ıntellekt arqyly
• kıberqauípsízdíkte — derekter men júıení qorǵau arqyly
• medıtsınada — epıdemıyaǵa qarsy jedel áreket etu arqyly
Alaıda taǵy bír mańyzdy másele bar — ol adamdardyń oılau júıesí. Qazír qarumen emes, bílímmen, ıdeyamen, baspen soǵysatyn zaman. Sondyqtan búgíngí kezde «ıdeyalar soǵysy» júríp jatyr dep aıtsaq ta bolady.
Bílím beru men gumanıtarlyq ǵylymdardyń rólí erekshe.
Kognıtıvtík egemendík degenímíz:
• óz bílím beru standarttarynyń boluy
• adamdardyń synı oılaı bíluí
• manıpulyatsıyaǵa boı aldyrmau qabíletí
Eger kez kelgen el ózgeníń ıdeyasy men modelderín túgeldeı kóshíre bastasa, ol bírte-bírte derbestígínen aıyrylyp qaluy ábden múmkín.
Qazaqstan qazír qaı salada bolsa da, kez kelgen reforma men bastamany ǵylymı negízge súıeníp baryp qolǵa aluǵa kóńíl bóle bastady.
Ǵylymǵa salynǵan qarjy — būl eldíń bolashaǵyna salynǵan ınvestıtsıya ekenín aıtady Shárípbek Aǵabaıūly.
Sondyqtan qauípsízdík kabınette ǵana emes, sonymen qatar unıversıtette, zerthanalar mene ǵylymı ortalyqtarda da qatar qalyptasuy kerek.
Memleket ǵylymdy damytsa — ol myqty árí táuelsíz bolyp qala bermek.