Almatyda 200-den astam tūrǵyn renovatsıya baǵdarlamasy ayasynda jańa baspana aldy, – dep habarlaıdy aqshamnews.kz tílshísí.
Almatydaǵy eskí tūrǵyn úıdíń 204 menshík ıesí 2026 jyldyń bírínshí toqsanynyń qorytyndysy boıynsha «Almaty qalasynyń tūrǵyn úıín 2030 jylǵa deıín jańartu baǵdarlamasy» ayasynda jańa páterlerge kóshtí.
Qonys audaru jūmystaryn «Almaty Renovation» JShS «Almaty» ÁKK» AQ-men jáne jeke ınvestorlarmen bírlesíp júzege asyrdy. Tūrǵyndarǵa «bólmege — bólme» qaǵıdaty boıynsha baspana ūsynyldy nemese būrynǵy jyljymaıtyn múlkíníń naryqtyq qūnyna sáıkes aqshalaı ótemaqy tólendí.
Páterler taza árleumen tapsyrylyp, qajettí ınfraqūrylymmen tolyq jabdyqtalǵan. Atap aıtqanda, ınternet jelísí qosylǵan, órtke qarsy júıeler ornatylǵan, santehnıka men as úı jabdyqtary, sonyń íshínde gaz nemese elektr plıtalary qarastyrylǵan.
Qonys audarǵan tūrǵyndardyń eń kóbí Túrksíb audanynda tírkeldí — 126 adam. Sonymen qatar, Áuezov audanynda — 53, Bostandyq audanynda — 13, Alatau audanynda — 6, Medeu audanynda — 3, Jetísu audanynda — 2, al Almaly audanynda 1 adam jańa baspanaǵa kóshtí.
Bıyl jalpy sany 95 úıdí būzu josparlanyp otyr.
Ǵımarattardy kóshíru jáne būzu jūmystary tek barlyq menshík ıeleríníń kelísímímen júrgízíledí. Erekshe qajettílígí bar azamattar úshín bírínshí qabattaǵy nemese lıft, pandus jáne kedergísíz kíru júıelerímen jabdyqtalǵan úılerden páterler qarastyrylǵan. Qala tūrǵyndarynyń qauípsízdígín qamtamasyz etu maqsatynda karkas-qamysty qūrylystardy, sondaı-aq tektonıkalyq jarylys aımaqtarynda ornalasqan ǵımarattardy būzuǵa erekshe nazar audarylyp otyr. Eger menshík ıelerí ūsynylǵan qonys audarudan bas tartsa, olar tozyǵy jetken tūrǵyn úıde qaluǵa qūqyly. Alaıda mūndaı jaǵdaıda tūruǵa baılanysty yqtımal qauíp-qaterler úshín jauapkershílík ózderíne júkteledí.
Jyl sońyna deıín «Almaty» ÁKK» AQ, «Almaty Renovation» JShS jáne ınvestorlardyń kúshímen 1 165 adamdy jańa páterlermen qamtamasyz etu josparlanǵan.
Jańartu baǵdarlamasyna qatysu úshín ınvestorlar «Almaty» ÁKK» AQ-nyń resmı saıty arqyly ótíním bere alady. Áleuettí ınvestorlardy íríkteu renovatsıya jobalaryn qarau, íríkteu jáne súıemeldeu qaǵıdalaryna sáıkes júrgízíledí.
«Renovatsıya baǵdarlamasyn íske asyru jaıly qalalyq ortany qalyptastyru jáne qoǵamdyq keńístíkterdí damytu arqyly halyqtyń ómír súru sapasyn arttyruǵa múmkíndík beredí. Sonymen qatar, megapolıstíń sáulettík kelbetí jańaryp, tūrǵyndar qauípsíz árí zamanauı baspanamen qamtylady. Jalpy, 2030 jylǵa deıín 1 403 eskí úıdí būzu jáne shamamen 7 500 menshík ıesín kóshíru josparlanyp otyr», — dedí «Almaty Renovation» JShS bas dırektory Erkebūlan Osmanbaev.
«Almaty qalasynyń tūrǵyn úıín 2030 jylǵa deıín jańartu baǵdarlamasyn» qala ákímdígí ázírlep, ony máslıhat 2024 jylǵy qarashada bekíttí. Baǵdarlamanyń ákímshísí — «Almaty» ÁKK» AQ, al uákílettí ūıym — «Almaty Renovation» JShS.