Almatydaǵy №2 Qalalyq balalar klınıkalyq auruhanasy dárígerlerí sırek kezdesetín qauíptí dert – sharby qabatynyń segmentarly ınfarktíne shaldyqqan 12 jastaǵy balaǵa ota jasady.
Sharby – ísh quysyn qorǵaıtyn maıly qabat. Ol úlken jáne kíshí sharby dep atalatyn 2 bólíkten tūrady. Bírínshí bólígí asqazandy toq íshekpen baılanystyryp tūrady.
Statıstıkalyq derekterge qaraǵanda, ınfarkttíń būl túrí balalarda óte sırek kezdesedí. Álem boıynsha būl dertke shaldyqqan nauqastardyń 13-14 paıyzy ǵana balalar eken. Auru belgíleríne qaraǵanda kóp jaǵdaıda ony ótkír soqyríshekten aıyru qıyn.
Auruhana dırektory Marat Rabandıyarovtyń aıtuynsha, keıde típtí zerthanalyq taldaular da aǵzadaǵy aqaudy anyqtap bere almaıdy. Jasóspírímníń qan taldaularynda aǵzadaǵy qabynu protsesínen belgí beretín azdaǵan ózgeríster baıqalypty. Tájírıbelí mamandar tez arada dıagnoz qoıyp, balanyń densaulyǵyn tūraqtandyrdy, qazír onyń ómíríne qauíp tóníp tūrǵan joq.
Patsıent auruhanaǵa íshtíń oń jaq tómengí bólígíníń qatty auyruy, qūsu jáne mazasyzdyq syndy shaǵymmen auyr halde jetkízílgen. Aldyńǵy 2 táulík úıde emdelgen. Alǵashynda myqtap ūstaǵan «ūstama» dert, bírte-bírte kúsheıe túsken jáne balanyń jaǵdaıy osy uaqyt íshínde nasharlaı túsíptí.
Ísh quysyna jasalǵan ultradybystyq zertteu nátıjesínde, úlken sharby qabaty būralyp, onda maıly tínder men sūıyqtyq jınalǵany, qan aınalymy būzylǵany belgílí boldy. Dárígerler tez arada ota jasau turaly sheshím qabyldady.
Dıagnostıkalyq laparoskopıya sharbynyń 360 gradusqa būralyp qalǵan bólígíníń qaraıyp, jansyzdana bastaǵanyn anyqtady. Sharby qabatynyń zaqymdanǵan bólígí bıopolyarly koagulyatsıyanyń kómegímen alyp tastaldy.
«Ota MÁMS qarajaty esebeníne jasaldy. Operatsıya sáttí óttí, basqa aqau tabylǵan joq. Besínshí kúní bala auruhanadan shyqty», - deıdí №2 BQKA kópbeıíndí hırurgıya bólímshesí meńgerushísí Marat Qaptaǵaev.
Gıstologıyalyq taldau nátıjesíne súıensek, patsıent densaulyǵyndaǵy kínárat qan aınalymynyń būzylyp, sharby qabatyna qan qūıyluy saldarynan bolǵan. Mamandardyń aıtuynsha, mūndaı jaraqattanǵan kezde nemese ótkír auru kezínde sharby qabatynda qan aınalymy būzylyp, dert sonyń saldarynan paıda bolady. Būl derttíń shekten tys artyq salmaq jınaǵan balalarda kezdesu qaupí artady. Sebebí mólsherden artyq maıly tín ísh quysyndaǵy qan aınalymyn nasharlatyp, túsetín salmaqty arttyrady jáne sharby qabatynyń aınalyp ketuíne áser etuí yqtımal.
M.ǵ.k., dotsent, hırurg-ordınator Sáule Súleımanovanyń sózínshe, mūndaı kezde uaqyt ótkízbeı dál dıagnoz qoyudyń mańyzy zor. Hırurgıyalyq ota qansha erte jasalsa nauqas ómírín saqtap qana qoımaı, derttíń auyr zardaptarynyń da aldyn aluǵa múmkíndík beredí.
