Almatylyq dárígerler auyr ınsultten keıín komaǵa túsken 67 jastaǵy áıeldí aman alyp qaldy, - dep habarlaıdy aqshamnews.kz tílshísí.
№4 qalalyq klınıkalyq auruhanada medıtsına salasynyń kásíbı ortasynda keń talqylauǵa túsken oqıǵa oryn aldy. Mūnda anevrızmanyń jaryluymen ótken ınsultten keıín komaǵa túsken 67 jastaǵy áıelge úsh kúrdelí ota jasaldy. Al tórt aıdan soń ol aq halatty abzal jandarǵa alǵys aıtu úshín auruhanaǵa ózí keldí.
Patsıent statsıonarǵa asa auyr halde tústí: essíz koma jaǵdaıy, deneníń sol jaq bólígíníń qımylsyzdyǵy, aıqyn afazıya jáne mı baǵany qūrylymdarynyń zaqymdanu belgílerí baıqaldy. Insult ortalyǵynyń deregínshe, tekseru nátıjesí subarahnoıdaldyq-parenhımatozdyq qan qūıyludy anyqtady, būl - eń qauíptí ınsult túríníń bírí. Ol qarynshalarǵa qannyń ótuímen jáne mı ísígíníń kúrt ūlǵayuymen qatar júredí.
Dárígerlerdíń aıtuynsha, mūndaı jaǵdaıdyń basym bólígí típtí auruhanaǵa jetpeı ólímmen ayaqtalady. Būl joly ár mınut sheshushí boldy. Patsıenttí multıdıstsıplınarlyq top -nevrolog, reanımatolog, neırohırurg jáne anestezıolog mamandar bírlesíp qabyldady. KT-dan bastap angıografıyaǵa deıíngí árbír tekseru kezeńí bólím meńgerushílerí men №4 QKA ınsult ortalyǵy basshylyǵynyń qatysuymen ótken konsılıumda talqylanyp otyrdy.
Sheshím jedel qabyldandy: em taktıkasy kídíríssíz qūrylyp, tar beıíndí mamandar tolyq jūmyldyryldy. Dárígerler patsıenttíń ómírí úshín kúreste bírínen soń bírí úsh ota jasady.
"Mı qūrylymdarynyń qysylu qaupíníń asa joǵary bolǵanyn eskere otyryp, patsıentke úsh shūǵyl ota jasau qajet boldy. Bírínshísí - jarylǵan anevrızmany endovaskulyarlyq embolızatsıyalau. Būl - qan ketudí toqtatuǵa jáne qaıta jaryludyń aldyn aluǵa múmkíndík beretín shaǵyn ınvazıvtí neırohırurgıyalyq ádís. Ekínshísí - syrtqy qarynshalyq drenaj ornatu. Onyń maqsaty - basíshílík qysymdy tómendetu jáne mı jūlyn sūıyqtyǵynyń aınalymyn tūraqtandyru. Úshínshísí - mı íshíndegí gematomany alyp tastaıtyn dekompressıyalyq ota. Būl asa dál mıkroskopıyalyq tehnıkany qajet etetín kólemdí neırohırurgıyalyq aralasu", - dep túsíndíredí Almaty №4 qalalyq klınıkalyq auruhana neırohırurgy Aldongar Aısautov.
Keıín, ūzaq uaqyt jasandy tynys aldyru qajet bolǵandyqtan, patsıentke traheostomıya jasaldy - būl tynys aludy qauípsíz júrgízuge jáne asqynudyń aldyn aluǵa múmkíndík berdí. Patsıent jan saqtau bólímínde bírneshe kún jatty. Osy uaqyt boıy mamandar toby monıtorıng júrgízíp, qarqyndy terapıya qoldandy: basíshílík qysymdy baqylau, neıroprotektıvtík sharalar, tynys alu men gemodınamıkany tūraqtandyru, su-elektrolıt tepe-teńdígín túzetu. Bírtíndep kórsetkíshter jaqsara bastady - ísínu azaıdy, nauqastyń sóıleuí qalpyna kele bastady, ayaq-qolyna kúsh qaıta orala bastady.
Ómíríne tóngen qauíp seıílgennen keıín nauqas beıíndí neırohırurgıya bólímíne auystyrylyp, onda ońaltuyn jalǵastyrdy. Úı jaǵdaıyndaǵy ońaltu da jaqsy nátıje berdí. Būl kınezıoterapıya, logopedıyalyq jūmys, neırondyq baılanystardy qalpyna keltíruden tūratyn ūzaq árí júıelí eńbek boldy.
Tórt aı ótken soń dárígerlerdíń ózí būny "dūrys tańdalǵan taktıkanyń sırek kezdesetín, shabyt syılaıtyn dálelí" dep atady.
№4 QKA neırohırurgıya bólímíníń ordınatorlar bólmesíne Valentına Dorofeeva kíríp keldí. Onyń sóıleuí tolyq qalpyna kelgen, júríp-tūrudy qaıta úırengen:
"Men osy auruhanaǵa, ózímdí emdegen dárígerleríme, barlyq medıtsına qyzmetkeríne shyn júrekten rızamyn. Mūnda tek hırurgter ǵana emes, adamnyń ómírí synǵa túsken sátte árqaısy óz rólín bíletín tūtas komanda jūmys ísteıdí", - deıdí Valentına Mıhaılovna.
Būl oqıǵa - mıǵa qatysty auyr zaqymdanular kezínde uaqtyly árí tıímdí kórsetílgen mamandandyrylǵan medıtsınalyq kómektíń aıqyn úlgísí. Patsıenttí júrgízu úderísí №4 QKA multıdıstsıplınarlyq toby tarapynan QR DSM qoldanystaǵy klınıkalyq hattamalaryna sáıkes júzege asyryldy.
Bıyl keıíngí 10 aıda №4 qalalyq klınıkalyq auruhananyń statsıonaryna 794 ınsult jaǵdaıymen túsken patsıent jáne neırohırurg mamandar jedel mı qan aınalymynyń būzyluy dıagnozy qoıylǵan patsıentterge shamamen 300 ota jasaǵan.