Ūlttyq ūlannyń «Ońtústík» óńírlík qolbasshylyǵyna qarasty Keńes Odaǵynyń Batyry, gvardıya polkovnıgí Bauyrjan Momyshūly atyndaǵy 5571 áskerı bólímínde «Ásker balalar kózímen» taqyrybynda ashyq esík kúní ūıymdastyryldy.
Sharanyń maqsaty – qazaq áskeríníń mártebesín kóteru, áskerı mamandyqtardy nasıhattau jáne jas ūrpaqty otansúıgíshtíkke tárbıeleu. Ís-sharaǵa Almaty qalasy Alatau audanyna qarasty mektepterden «Jas búrkít», «Jas sarbaz» áskerı-patrıottyq klubtary men qozǵalysyna múshe 100-den astam oqushy qatysty.
Ashyq esík kúní Qazaqstan Respublıkasy Ūlttyq ūlanynyń «Ūlttyq ūlan – el aıbyny!» respublıkalyq aktsıyasy ayasynda jáne Qazaqstan Respublıkasynyń Táuelsízdík kúníne oraı ótkízíldí.
Oqushylar aldymen áskerı bólímníń kazarmalyq ǵımarattaryn aralap, jauyngerlerdíń kúndelíktí tírshílígímen tanysty. Áskerı bólímníń tarıhy men jauyngerlík joly turaly aqparat beríldí. Sondaı-aq AK-74 avtomaty jáne ózge de qaru-jaraq úlgílerí kórsetílíp, áskerı kıím nysandary tanystyryldy. Áskerı tehnıkalar men kólíkterdíń múmkíndíkterí túsíndírílíp, olardy qoldanu erekshelíkterí turaly málímet beríldí.
- Búgín bíz úshín áskerı ómírmen etene tanysuǵa úlken múmkíndík boldy. Qaru-jaraq, áskerı forma, tehnıka – bárí óte áserlí. Sarbazdardyń daıyndyǵy men tártíbí, qarumen jūmys ísteu sheberlígí mení qatty qyzyqtyrdy. Osyndaı quatty armıyamyz baryn maqtan tūtamyn. Bolashaqta men de Otan aldyndaǵy boryshymdy óteudí armandaımyn, - dedí №156 mekteptíń 11-synyp oqushysy Edílbaı Dáulet.
Mektep ūjymy men áskerı bólím basshylyǵy mūndaı ís-sharalar jastardyń boıynda patrıottyq ruhty qalyptastyryp, bolashaq mamandyq tańdauǵa oń yqpal etetínín atap óttí.
Shara sońynda Alatau audandyq bílím bólímíníń áskerı ádískerí Ecbolat Ualıev pen №210 mektep-lıtseı dırektorynyń tárbıe ísí jóníndegí orynbasary Almagúl Sarmaqova áskerı bólím basshylyǵyna jastarǵa arnalǵan taǵylymdy ís-shara ūıymdastyrǵany úshín alǵys bíldírdí.