Būrynǵy kópkonteınerlí bazar «Tıgrahaud» Almatyda tolyq modernızatsıyadan keıín Abai Plaza sauda úıíne aınaldy. Obektíní jańartuǵa 4,5 mıllıard teńge jeke ınvestıtsıya salyndy, – dep habarlaıdy aqshamnews.kz tílshísí.
Foto: Qazaqstan Respublıkasynyń Sauda jáne ıntegratsıya mınıstrlígí
Sauda obektísín Qazaqstan Respublıkasynyń Sauda jáne ıntegratsıya vıtse-mınıstrí Aıdar Abıldabekov Almatyǵa jūmys sapary barysynda aralady.
«Tıgrahaud» JShS-níń bas dırektory Azamat Shagıtovtyń aıtuynsha, modernızatsıyadan keıín sauda úıíníń aumaǵy 7 300 sharshy metrdí qūrady.
— Bíz bazardy 4,5 mıllıard teńge jeke ınvestıtsıya esebínen modernızatsıyalap, 7 300 sharshy metrlík sauda ortalyǵyna aınaldyrdyq. Qazír sauda úıínde 55 jalǵa alushy jūmys ísteıdí, olardyń 80%-y — bízdíń būrynǵy jalǵa alushylar, — dep habarlady Azamat Shagıtov.
Obektíní modernızatsıyalau Almatydaǵy sauda bazarlaryn jańartu jóníndegí jol kartasy sheńberínde júrgízíldí.
Qalanyń jalpy aumaǵynda 37 bazar jūmys ísteıdí, olardyń 31 — ámbebap, al altauy — mamandandyrylǵan. Sonymen qatar Almatyda 21 sauda-oıyn-sauyq ortalyǵy, 29 sauda ortalyǵy, 42 sauda úıí jáne 4 457 «úı janyndaǵy» dúken bar.
Almaty elímízdíń eń írí sauda ortalyǵy bolyp qala beredí. 2026 jyldyń bírínshí jartyjyldyǵynyń qorytyndysy boıynsha qaladaǵy íshkí sauda kólemí 12,3 trln teńge boldy. Almaty Qazaqstannyń íshkí saudasynyń 34%-yn qamtıdy.
Qańtar-mausym aralyǵynda bólshek sauda kólemí 3,6 trln teńgege, kóterme sauda — 8,6 trln teńgege jettí. Osy kezeńde qala saudasyna 161,8 mıllıard teńge ınvestıtsıya tartyldy.
Būǵan deıín Qazaqstanda marketpleıster onlaın-saudanyń 86%-yn ıemdenetíní turaly habarlanǵan bolatyn.