Jobanyń basty maqsaty – almatylyq jastarǵa ıdeyasyn ūsynyp qana qoımaı, olardy óz kúshímen júzege asyruǵa múmkíndík beru, – dep habarlaıdy aqshamnews.kz tílshísí.
Almatyda «Jastar qatysatyn byudjet» jańa jobasyna ótíním qabyldau bastalady. Qazaqstanda alǵash ret jastar qala damuyna qatysty bastamasyn ūsynyp, olardy júzege asyru úshín memlekettík qarjylandyruǵa ıe bolady. Būl turaly jobany qoldap otyrǵan Almaty qalasynyń Jastar sayasaty basqarmasynyń ókílderí málímdedí.
«“Jastar qatysatyn byudjet” memleket pen jastar arasyndaǵy ózara ís-qımyldyń jańa tetígíne aınalady. Būl joba árbír belsendí almatylyqqa ıdeyasyn naqty qalalyq jobaǵa aınaldyruǵa múmkíndík beredí. Qoǵamdyq keńístíkterdí kóríktendíruden bastap ekologıyalyq bastamalarǵa, tsıfrlyq servısterge, bílím beru baǵdarlamalary men mádenı ís-sharalarǵa deıín jastardyń ózderí Almatyny odan árí zamanauı, jaıly árí tartymdy qalaǵa aınaldyratyn ūsynystaryn júzege asyra alady», – dedí Almaty qalasy Jastar sayasaty basqarmasynyń basshysy Azız Kajdenbek.
Jobaǵa Almatyda tūratyn 18 ben 35 jas aralyǵyndaǵy Qazaqstan azamattary qatysa alady. Ótínímdí jeke ózí nemese bastamashyl top, jastar ūıymy ne qoǵamdyq bírlestík qūramynda beruge bolady.
Ótínímder jasalmaty.kz portaly arqyly elektrondyq formatta qabyldanady. Qatysushylar portalǵa tírkelíp, ótínímdí toltyruy, sondaı-aq joba sıpattamasyn, shyǵyn smetasyn, kúntízbelík jospardy, tanystyrylymdy jáne ózge de qajettí qūjattardy júkteuge tıís.
Baıqauǵa qalalyq ortany kóríktendíru, ınfraqūrylymdy damytu, ekologıya, mádenıet, sport, bílím beru, tsıfrlyq tehnologıya, jastar kásípkerlígí, turızm, medıa, ınklyuzıya, psıhologıyalyq densaulyq jáne ózge de áleumettík mańyzy bar baǵyttar boıynsha bastamalar qabyldanady.
Íríkteu bírneshe kezeńnen tūrady. Aldymen qūjattar tehnıkalyq tekseruden ótedí. Keıín ótínímdí qūramyna Jastar sayasaty basqarmasynyń ókílderí, máslıhat deputattary, Qoǵamdyq keńes múshelerí, ǵylymı jáne sarapshylyq qauymdastyq ókílderí kíretín konkurstyq komıssıya qaraıdy.
Jobanyń negízgí kezeńderíníń bírí – ashyq onlaın dauys beru. Saraptamalyq íríkteuden ótken jobalar arnaıy platformaǵa ornalastyrylady. Qazaqstan tūrǵyndary olarǵa elektrondyq tsıfrlyq qoltańba nemese SMS arqyly rastau arqyly dauys bere alady. Árbír paıdalanushy úsh jobadan artyq dauys bere almaıdy.
Bír jobaǵa bólínetín qarjylaı qoldau kólemí 500 myńnan 5 mıllıon teńgege deıín bolady. Baǵdarlamanyń jalpy byudjetí – 90 mıllıon teńge. 12-den 60-qa deıín jastar bastamasyn qoldau josparlanǵan. Ár jobany júzege asyru merzímí bír aıdan úsh aıǵa deıín sozylady.
Joba ayasynda ondaǵan jastar bastamasy júzege asyrylyp, 500-den astam almatylyq jas qatyspaq. Sonymen qatar jastardyń azamattyq belsendílígí artyp, qalanyń damuyna úles qosuǵa daıyn jańa buyn jastar kóshbasshylary qalyptasady dep josparlanyp otyr.