Respublıkalyq oqıǵalar men ís-sharalar kúntízbesíne Jetísu oblysy tarapynan engízílgen «Alakól tolqyny» mádenı-turıstík festıvalí Jetísu oblysy, Alakól audany, Aqshı auylyndaǵy Alakól kólíníń jaǵalauynda tıístí deńgeıde ūıymdastyrylyp, óz máresíne jettí.
«Alakól tolqyny» festıvalíne Qytaı, Reseı, Belarus, Ózbekstan jáne Qyrǵyzstannan kelgen sheteldík turıster men qonaqtar, sondaı-aq Qazaqstannyń ár oblysynan kelgen demalushylar men óńír tūrǵyndaryn qosa alǵanda, 5 myńnan astam adam qatysty.
Festıvaldíń saltanatty ashylu rásímí Alakól óńíríníń turıstík áleuetín, tabıǵı erekshelíkterí men tarıhı-mádenı qūndylyqtaryn dárípteıtín arnaıy beınerolıktíń kórsetílímímen bastaldy.
Resmı bólímde alǵashqy qūttyqtau sóz Jetísu oblysy ákímíníń orynbasary Marlen Kólbaevqa berílíp, ol óńírde turızm salasyn damytu, turıstík ınfraqūrylymdy jetíldíru jáne Alakól jaǵalauyn halyqaralyq deńgeıdegí turıstík baǵyt retínde damytu baǵytynda atqarylyp jatqan jūmystar turaly aıtty.
Odan keıín qūttyqtau sóz sóılegen Qazaqstan Respublıkasy Turızm jáne sport vıtse-mınıstrí Mıras Tólebaev Alakól óńíríníń elímízdíń turızm salasyndaǵy strategıyalyq mańyzyn atap ótíp, mūndaı mádenı-turıstík jobalardyń Qazaqstannyń turıstík ımıdjín nyǵaıtudaǵy rólíne toqtaldy. Sondaı-aq festıvaldíń ūıymdastyrushylaryna rızashylyǵyn bíldíríp, qatysushylar men qonaqtarǵa ízgí tílegín jetkízdí.
Resmı bólímnen keıín festıvaldíń kontserttík baǵdarlamasy bastalyp, Qazaqstan estradasynyń tanymal óner jūldyzdary Turar (Tūrar), Ayree (Aırıı) jáne Asel Mekebaeva kórermenderge kóteríńkí kóńíl kúı syılady. Tanymal oryndaushylardyń súıíktí ánderí Alakól jaǵalauyna jınalǵan myńdaǵan kórermenníń ystyq yqylasyna bóleníp, erekshe merekelík atmosfera qalyptastyrdy.
Festıval ayasynda qonaqtarǵa arnalǵan oıyn-sauyq baǵdarlamasy da ūıymdastyryldy. Atap aıtqanda, hodulısterdíń áserlí qoıylymdary ūsynylyp, tírí músínder men alyp oıynshyq keıípkerlerí óner kórsettí. Olar festıval qonaqtarymen jarqyn júzdesíp, estelík suretterge túsíp, ásírese balalarǵa erekshe quanysh syılady.
Sonymen qatar, kórermenderdíń qatysuymen ınteraktıvtí oıyndar ótkízílíp, belsendí qatysushylarǵa arnaıy syılyqtar tabystaldy. Festıval aumaǵynda arnaıy fotozona jūmys ístep, kelushílerge Alakól jaǵalauyndaǵy jarqyn sátterdí estelíkke aınaldyruǵa múmkíndík beríldí.
Keshtíń barysynda kásíbı DJ-díń qatysuymen zamanauı muzykalyq baǵdarlama ūıymdastyryldy. Áserlí dybystyq súıemeldeu, festıvaldíń sánín keltíríp, ashyq aspan astyndaǵy túngí bı alańynda myńdaǵan qonaqtyń basyn qosty.
Festıvaldíń sharyqtau shegí retínde Alakól aspanyn jarqyrata kómkergen áserlí merekelík otshashu ūıymdastyryldy. Túrlí túske boyalǵan ot shashular kól jaǵalauyna erekshe kórík beríp, festıvaldíń jarqyn qorytyndysyna aınaldy.
«Alakól tolqyny» festıvalíníń basty maqsaty – Jetísu oblysynyń turıstík áleuetín keńínen tanytu, Alakóldíń halyqaralyq turıstík baǵyt retíndegí bedelín arttyru, íshkí jáne kelu turızmín damytu, óńírdíń mádenı ómírín jandandyru jáne qazaqstandyq árí sheteldík turısterge joǵary deńgeıdegí mádenı demalys ūsynu boldy.
Mádenıet pen turızmdí toǵystyrǵan aıtuly joba retínde ótken «Alakól tolqyny» festıvalí óńírdíń turıstík tartymdylyǵyn arttyruǵa, Jetísu oblysynyń oń ımıdjín qalyptastyruǵa jáne Alakól jaǵalauyn halyqaralyq deńgeıdegí turıstík ortalyq retínde dárípteuge óz úlesín qosty.
Oblystyq turızm basqarmasynyń málímetí boıynsha daıyndaldy.