Almaty shaǵyn jáne orta kásípkerlíktí damytu kórsetkíshterí boıynsha da elímízdegí jetekshí óńírlerdíń bírí bolyp qala beredí. Búgínde megapolıs shaǵyn jáne orta kásípkerlík ónímín óndíru kólemí boıynsha elímízde kósh bastap keledí. Sonymen qatar sauda salasyn damytu jáne bıznestí qoldau sharalaryn íske asyru baǵytynda da bírínshí orynda tūr.
Almaty qalasy Kásípkerlík jáne ınvestıtsıyalar basqarmasy ókílderíníń málímetínshe, 2026 jyly 1 shíldedegí jaǵdaı boıynsha qalada 362 345 belsendí shaǵyn jáne orta kásípkerlík subektísí jūmys ísteıdí. 2025 jyldyń qorytyndysynda shaǵyn jáne orta kásípkerlík subektílerí óndírgen óním kólemí 306,2 mlrd teńge bolyp, aldyńǵy jylmen salystyrǵanda 3,1%-ǵa óstí.
Kásípkerlík belsendílíktí odan árí damytu maqsatynda Almatyda bıznestí qoldaudyń memlekettík jáne óńírlík baǵdarlamalary íske asyrylyp jatyr. 2026 jyly jergílíktí byudjetten kásípkerlerdí subsıdıyalau men jeńíldetílgen nesıeleuge 26 mlrd teńge bólíndí. Bıylǵy jyldyń bírínshí toqsanynda 304 jobaǵa qoldau kórsetílíp, jalpy somasy 46 mlrd teńgeníń nesıesí beríldí.
Qala ekonomıkasynyń damuyna sauda salasy da qomaqty úles qosyp keledí. Almaty respublıka boıynsha sauda salasynda da kósh bastap tūr. Qala respublıkadaǵy jalpy sauda kólemíníń 34%-yn qamtamasyz etedí. 2026 jyldyń alǵashqy alty aıynda sauda aınalymy 12,3 trln teńgege jetíp, ótken jyldyń osy kezeńímen salystyrǵanda 5,3%-ǵa artty.
Kásípkerlíktí qoldaudyń negízgí baǵyttarynyń bírí – shaǵyn ónerkásíptík parkterdí damytu. Būl tetík kásípkerlerge zamanauı óndírístík ınfraqūrylymǵa qol jetkízuge múmkíndík beríp, jańa jūmys oryndaryn ashuǵa yqpal etedí.
Qazírgí uaqytta Almatyda jalpy qūny 53,1 mlrd teńge bolatyn 70 shaǵyn ónerkásíptík park jobasyn júzege asyru josparlanǵan. Sonyń nátıjesínde 6 874 jańa jūmys orny qūrylyp, óndírístík maqsattaǵy 430 myń sharshy metrden astam alań paıdalanuǵa beríledí.
Jańa formattaǵy ónerkásíptík parkterde óndírístík tsehtarmen qatar keńse, kórme jáne servıstík aımaqtar ornalasady. Būl mashına jasau, tamaq, jıhaz, hımıya jáne qūrylys ındustrıyasy kásíporyndarynyń damuyna serpín beredí.
Mamandardyń aıtuynsha, kásípkerlíktí qoldau men óndírístík ınfraqūrylymdy damytuǵa baǵyttalǵan būl jobalar Almatynyń ınvestıtsıyalyq tartymdylyǵyn kúsheıtíp, ekonomıkanyń tūraqty ósuíne jol ashady.