Jarystyń sońǵy kúnínde jūptyq fınal ótíp, jeńímpazdar men júldegerler marapattaldy, – dep habarlaıdy aqshamnews.kz tílshísí.
Chempıonatqa Qazaqstannyń túrlí óńírlerínen kelgen jas sportshylar qatysty. Būl doda 2026 jylǵy halyqaralyq jarystarǵa íríkteu kezeńí sanalady. Atap aıtqanda, 15–25 shílde aralyǵynda Taılandta ótetín Azıya chempıonaty men jasóspírímder arasyndaǵy álem chempıonatyna qatysatyn sportshylar anyqtaldy.
Elímízdegí su sporttaryn damytuǵa jauapty Qazaq Aquatics ūıymy jarysty joǵary deńgeıde ūıymdastyrdy. Ūıymnyń atqarushy dırektory Asel Orynbasarova turnırdíń mańyzyn erekshe atap óttí. - Būl jarys sportshylar úshín óte mańyzdy. Sebebí jeńímpazdar men júldegerler Azıya chempıonaty men jasóspírímder arasyndaǵy álem chempıonatynda Qazaqstan namysyn qorǵaıdy. Sonymen qatar bíz Olımpıada oıyndary, álem chempıonattary jáne Álem kubogynda tórelík etetín halyqaralyq deńgeıdegí tóreshílerdí shaqyrdyq. Mūndaı tájírıbe jas sportshylarǵa da, jattyqtyrushylar men qazaqstandyq tóreshílerge de úlken paıdasyn tıgízedí, - dedí Asel Orynbasarova.
Chempıonat kezínde qatysushylarǵa erekshe kóńíl bólíndí. Barlyq balaǵa respublıkalyq jáne jergílíktí kórkem júzu federatsıyalary atynan estelík syılyqtar tabystaldy.
Jarystyń eń jas árí kózge túsken qatysushylarynyń bírí - 9 jastaǵy Teya Golubtsova. Būl onyń ekínshí jarysy eken.
– Bírínshí bolyp shyǵu maǵan qıyn boldy. Bíraq óz ónerímdí jaqsy kórsete alǵanyma quanyshtymyn, – dedí jas sportshy.