BI Group basshysy Aıdyn Rahımbaev pen jūbaıy Anar Rahımbaeva The Giving Pledge – «Qaıyrymdylyq antyna» qol qoıdy, dep habarlaıdy Aqshamnews.kz tílshísí.
Būl bastamaǵa qosylǵandar baılyǵynyń kemínde jartysyn qaıyrymdylyqqa baǵyttauǵa míndetteme alady.
Rahımbaevtardyń aıtuynsha, olar kapıtalynyń jartysynan kóbín áleumettík jobalarǵa jūmsaudy josparlap otyr.
«Bíz kapıtalymyzdyń jartysynan kóbín kezeń-kezeńímen qaıyrymdylyqqa baǵyttauǵa míndettenemíz. Al qalǵan bólígín balalarymyzǵa qaldyrǵymyz keledí. Bíraq jarty mıllıard dollar da bíz úshín shek emes. Kóbírek tabys tapsaq, ıgí ísterge de kóbírek qarajat bólemíz. Bíz bolashaq ūrpaqqa paıdasy tıetín, ūzaq merzímdí áserí bar jobalarǵa ınvestıtsıya salǵymyz keledí. Būǵan deıín áleumettík jobalarǵa shamamen 100 mln dollar bóldík. Balalarymyzdyń da būl bastamany qoldap, qūndylyqtarymyzdy bólísetíní quantady», – dedí Aıdyn Rahımbaev.
Aıdyn jáne Anar Rahımbaevtar mamyr aıynyń sońynda ótetín The Giving Pledge qauymdastyǵynyń kezektí kezdesuíne shaqyryldy. Sol jıynda olardyń «Qaıyrymdylyq antyna» qol qoıyp, Ortalyq Azıyadan būl bastamany qoldaǵan alǵashqy ókílder atanǵany resmı jarıyalanady.
Aıdyn Rahımbaevtyń sózínshe, negízgí basymdyq Qazaqstandaǵy jobalarǵa beríledí. Qarajat mektep saluǵa, balalar úılerín jabuǵa, Ortalyq Azıyadaǵy balalardy qoldauǵa, ūlttyq dástúrlerdí saqtauǵa jáne Qazaqstan tarıhyn nasıhattauǵa baǵyttalmaq.
Sarapshylar būl sheshím Qazaqstandaǵy ózge de írí kásípkerlerdíń qaıyrymdylyq bastamalaryna serpín beruí múmkín ekenín aıtady.