Almatyda Qytaıdan tauar jetkízumen aınalysqan Araılym Qojamūratovaǵa qatysty sot úkímí shyqty. Áleumettík jelíde Aıs Mūratova degen atpen tanylǵan kásípker alayaqtyq jáne qylmystyq jolmen alynǵan aqshany zańdastyru baptary boıynsha kínálí dep tanyldy, dep habarlaıdy Aqshamnews.kz tílshísí KTK arnasyna sílteme jasap.
Tergeu málímetínshe, ol áleumettík jelí arqyly Qytaıdan jıhaz, tūrmystyq tehnıka men ydys-ayaqty kóterme baǵamen jetkízíp beruge uáde etken. Negízínen bólshek saudamen aınalysatyn kásípkerlermen jūmys ístegen. Klıentter tauar úshín aqshany onyń jáne tuystarynyń shottaryna audaryp otyrǵan.
Ís boıynsha jalpy shyǵyn kólemí 4,5 mıllıard teńgeden asqan. Jábírlenushí retínde 290 adam tanyldy.
Sot protsesí jarty jyldan astam uaqytqa sozyldy. Sot Qojamūratovany 12 jylǵa bas bostandyǵynan aıyrdy. Alaıda kámeletke tolmaǵan balasynyń boluyna baılanysty jaza bír jylǵa keıínge shegeríldí. Sondaı-aq ol jábírlenushílerge keltírílgen materıaldyq shyǵyndy óteuge míndetteldí.
Būl ís boıynsha taǵy 12 adam 6 jyldan 8 jylǵa deıín bas bostandyǵynan aıyryldy. Olar áleumettík jelí júrgízíp, klıent tartumen jáne qoıma jūmysymen aınalysqan.
Jábírlenushíler sot úkímímen kelísken.