Qazaqstannyń tehnıkalyq jáne kásíptík bílímí tarıhı serpílís jasady. ALMATY POLYTECHNIC COLLEGE studentterí AQSh-ta ótken robototehnıkadan FIRST Tech Challenge World Championship 2026 álem chempıonatynan abyroımen oraldy, – dep habarlaıdy aqshamnews.kz tílshísí.
Hyuston tórínde olar Qazaqstannyń ozyq tehnologıyalar kóshínde kele jatqanyn jáne osy salanyń jańa baǵyttaryn aıqyndaı alatynyn pash ettí.
Bıylǵy Hyuston dodasy barlyq qūrlyqtan myńdaǵan qatysushyny jınady, bíraq almatylyqtar fınaldyń basty keıípkerleríne aınaldy. Kolledjdíń qos qūramasy — KAP jáne TGJ — bedeldí Reach Award atalymynda bírínshí jáne úshínshí oryndardy ıelendí. Būl marapat STEM-tehnologıyalardy nasıhattauǵa qosqan erekshe úlesí men joǵary ınjenerlík sheberlígí úshín beríledí.
Ortalyq Azıyadan álem shyńyna deıín
Būl jetístík kezdeısoq emes. Hyustondaǵy jeńíske jol Central Asia FIRST Championship aımaqtyq chempıonatynan bastaldy. Dál osy Almatyda ótken auqymdy dodada bízdíń komandalar Ortalyq Azıyanyń eń myqtylarymen saıysqa túsíp, ózderíníń tehnıkalyq sheshímderín shyńdady. Būl chempıonat jígítterge álemdík arenaǵa joldama beríp qana qoımaı, úlken tájírıbe mektebí boldy.
Eske sala keteıík, 2026 jyl Qazaqstanda Prezıdenttíń Jarlyǵymen Tsıfrlandyru jáne jasandy ıntellekt jyly bolyp jarıyalanǵan. Studentterdíń jeńísí — eldíń jahandyq JI jáne robototehnıka naryǵynda básekege qabílettí kadrlar tárbıelep otyrǵanynyń aıqyn dálelí.
Būl jeńís qandaı múmkíndíkter beredí?
Tehnıkalyq jáne kásíptík bílím beru júıesí úshín būl — tarıhı oqıǵa. Jeńímpazdardy alda úlken múmkíndíkter kútíp tūr:
— Jahandyq mansap: FIRST jeńímpazdaryn MIT, Stanford unıversıtetterí men Google, NASA sekíldí alpauyt korporatsıyalar moıyndaıdy.
— Kásíbı daǵdylar: Komandada jūmys ísteu, qatań merzímde sheshím qabyldau jáne kúrdelí ınjenerlík míndetterdí oryndau qabíletí búgíngí naryqta altynmen teń.
— Halyqaralyq baılanys: Studentter AQSh, Úndístan jáne Vetnamnan kelgen jas ınjenerlermen baılanys ornatyp, bolashaq startaptarǵa negíz qalady.
ALMATY POLYTECHNIC COLLEGE dırektory Medet Omarbekov: «Tsıfrlandyru jáne jasandy ıntellekt jylynda bízdíń studentterímíz tehnologıyalyq derjavalarmen terezesí teń saıysty. Būl bízdíń kolledjde álemdík standartqa saı mamandar dayarlanatynyn kórsettí. Shákírtterímízdíń qazaqstandyq robototehnıka tarıhynda jańa paraq ashqanyn maqtan tūtamyz», — dep atap óttí.