Óńírlík kommunıkatsıyalar qyzmetíníń ókílderí «Zerleu» avtorlyq úıínde bolyp, qazaqtyń qoldanbaly óneríníń eń sırek árí názík baǵytynyń bírí - altyn jíppen kesteleu ónerín qalaı qaıta jańǵyrtyp jatqanyn kórdí, - dep habarlaıdy aqshamnews.kz tílshísí.
Sheber Aıjan Ábdubaıttyń studıyasyndaǵy altyn jáne kúmís jíppen tígílgen kesteler men kúrdelí oyu-órnek alǵash kórgen adamdy tań qaldyryp, dál osy jerde ótken tarıh pen qazírgí shaq túıísíp jatqandaı áser alady. Kezínde handardyń, bıler men sūltandardyń kıímín dál óstíp zerlegen.
Qazaqstan alǵash táuelsízdík alǵan jyldary būl bíregeı óner joıylyp ketudíń az-aq aldynda tūrdy. Qanshama qūpıya-syry ūmytylyp, dástúrdíń ózí kómeskílene bastaǵan edí. Alaıda zertteushíler men osyndaı adamdardyń arqasynda búgíngí kúní ol qaıta jańǵyryp keledí.
Aıjan Ábdubaıt — dızaıner-restavrator, Qazaqstan Respublıkasy Suretshíler odaǵynyń múshesí, «Jíger» festıvalíníń laureaty jáne osy salaǵa ondaǵan jylyn arnaǵan sanauly sheberdíń bírí. Ol jarty ómírín osy altyn jíppen kesteleu ónerín zerttep, ony qalpyna keltíruge arnapty.
Onyń aıtuynsha, aǵash óńdeu, zergerlík ís, toqyma, kıíz basu pen kílem toqu sıyaqty qoldanbaly ónerdíń túrí óte kóp. Keste óneríníń ózí de aıqas tígísten bastap tegís kestege deıín san aluan baǵytty qamtıdy eken. Ásírese zerleudíń alar orny erekshe.
«Būl — joıylyp ketuge shaq qalǵan elıtalyq óner. Ol halqymyzdyń mádenıetíníń qanshalyqty baı bolǵanyn kórsetedí. Sondyqtan men óz ómírímdí osy ónerdí zertteuge, nasıhattauǵa arnadym», — deıdí sheber.
Aıjan Ábdubaıttyń Jáńgír hannyń jary Fatıma hanshanyń Bírínshí Nıkolaıdyń taqqa otyru rásímíne kıgen kóılegí men kamzolyn qaıta qalpyna keltírgen. Sondaı-aq ol Qoja Ahmet Yasauı kesenesíndegí qabírdí jabatyn kílem men Jáńgír hannyń áskerı kıímín qalpyna keltírísíptí.
Ūlttyq kıím qazír mereke kezínde ǵana kıetín kıím boludan qalyp, qala ómíríníń de ajyramas bólígíne aınalyp bara jatyr.